नेरे प्राथमिक आरोग्य केंद्रातील शिबिराला प्रतिसाद

नेरे प्राथमिक आरोग्य केंद्रातील शिबिराला प्रतिसाद
५४१ रुग्णांची मोफत तपासणी व उपचार
पनवेल, ता. ८ (बातमीदार) ः पनवेल तालुक्यातील नेरे येथील प्राथमिक आरोग्य केंद्रात ‘स्वस्थ नारी, सशक्त परिवार’ अभियानांतर्गत भव्य आरोग्य शिबिराचे आयोजन करण्यात आले होते. या शिबिराला चांगला प्रतिसाद मिळाला.
शिबिराचे आयोजन जिल्हा शल्यचिकित्सक डॉ. अपर्णा पवार यांच्या मार्गदर्शनाखाली करण्यात आले, तर वैद्यकीय विभागाचे नेतृत्व डॉ. आलोक बावलेकर आणि डॉ. अंजली पाटील यांनी केले. आरोग्य विभागातील अधिकारी, कर्मचारी आणि आशा सेविकांनी या शिबिराला यशस्वीरीत्या पूर्ण केले. शिबिरामध्ये मोफत आरोग्य तपासणी, औषध वितरण, कॅन्सर स्क्रिनिंग, क्षयरोग तपासणी, रक्त चाचण्या, एक्स-रे, दंत व नेत्रतपासणी अशा अनेक सेवांचा लाभ नागरिकांना मिळाला. एकूण ५४१ रुग्णांची तपासणी व उपचार करण्यात आले, त्यापैकी ३४ रुग्णांना पुढील उपचारासाठी रुग्णालयात पाठविण्यात आले. याशिवाय, १० नागरिकांनी रक्तदान केले, तर ५० नागरिकांचे आरोग्य विमा कार्ड तयार करण्यात आले. शिबिरामध्ये स्थानिक संस्थांचा उत्स्फूर्त सहभाग नोंदवला गेला. विशेषतः मुंबई वेस्ट मॅनेजमेंट लिमिटेड या सामाजिक जबाबदारी पार पाडणाऱ्या संस्थेने लहान मुलांसाठी आवश्यक औषधे मोफत वितरित केली. यामुळे शिबिरात सहभागी झालेल्या मातांना व बालकांना तत्काळ उपचार उपलब्ध झाले. बालरोग विभागात तपासणी केलेल्या २५ मुलांपैकी बहुसंख्यांना सर्दी, खोकला, ताप व हंगामी आजारांसाठी औषधे देण्यात आली.