घाटकोपरमधील रामलीला महोत्‍सवाला प्रतिसाद

घाटकोपरमधील रामलीला महोत्‍सवाला प्रतिसाद
श्रीराम विवाह प्रसंग पाहून भाविक मंत्रमुग्ध
घाटकोपर, ता. २९ (बामतीदार) ः
घाटकोपर येथील माणिकलाल मैदानावर श्रीरामलीला महोत्सव समितीतर्फे आयोजित रामलीलेमध्ये श्रीराम-सीता विवाह सादर करण्यात आला. अत्याधुनिक साधन सामग्रीसह सज्ज झालेल्या कलाकारांनी राम-सीता विवाहाचा प्रसंग नेत्रदीपक पद्धतीने साकारला, ज्याला प्रेक्षकांनी उत्स्फूर्त दाद दिली. यंदाच्या रामलीला महोत्‍सवाचे ६२ वे वर्ष आहे.
रामलीलेच्या पंडालमध्ये मर्यादा पुरुषोत्तम प्रभू श्रीराम यांच्या जीवनातील अनेक महत्त्वपूर्ण प्रसंगांचे अप्रतिम सादरीकरण करण्यात आले. राम-सीता विवाहाच्या प्रसंगी राजांचे स्वागत, धनुष्य तोडण्यात अपयश, लक्ष्मणाचा रोष, रावणाचे आगमन, श्रीरामांनी शिवधनुष्य भंग करणे, परशुराम संवाद तसेच सीतेने रामाला वरमाला घालणे असे रोमहर्षक प्रसंग पाहून प्रेक्षक मंत्रमुग्ध झाले.
राम-सीता विवाह भक्तिमय वातावरणात पार पडला. मैदानात रामभक्तांची वाढती संख्या लक्षात घेऊन समितीने सुरक्षा व्यवस्था अधिक कडक केली होती. अतिरिक्त पोलिस बंदोबस्त ठेवण्यात आला.
दरवर्षीपेक्षा यंदा आधुनिक पद्धतीने सादरीकरण करण्यात आले, अशी प्रतिक्रिया कार्यकारिणी अध्यक्ष सुनील दामोदर दुबे, ट्रस्ट बोर्ड अध्यक्ष अशोक रमापती दुबे यांनी दिली.