गिरगावच्‍या जगदंबेच्‍या दर्शनासाठी गर्दी

गिरगावच्‍या जगदंबेच्‍या दर्शनासाठी गर्दी
कोकण गोव्यामधून भक्त दाखल
कुलाबा, ता. २९ ः गिरगाव येथील गिरगाव गायवाडी क्रिकेट क्लब सार्वजनिक नवरात्र उत्सव मंडळातर्फे आई जगदंबा माउलीची शाडूची सहा फूट उंचीची मूर्ती बसवण्यात आली आहे. देवी नवसाला पावते, अशी आख्यायिका असल्यामुळे दर्शनासाठी कोकण तसेच गोव्यातून भक्त दाखल होत आहेत.
शंभर वर्षांचा इतिहास असलेल्या गायवाडीमध्ये प्रवेश करताना गाईची दोन मुखे लागतात. दोन मुखांमुळेच गायवाडीचे नाव संबोधण्यात येते. प्राचीन काळामध्ये या ठिकाणी गायींचे गोठे होते. सध्या येथे नवरात्रोत्सवाची धूम आहे. यंदा नवरात्रोत्‍सवाचे हे ३९ वे वर्षे आहे. गेल्या आठ दिवसांपासून जगदंबा माउलीसाठी आरती, भजन, भंडारा व हळदी-कुंकू यासारखे सांस्कृतिक कार्यक्रम करण्यात येत आहेत. गुजराती, मारवाडी, राजस्थानी व मराठी लोक या ठिकाणी मोठ्या प्रमाणात राहात असून, संध्याकाळी देवीच्या आरतीला सर्व एकत्रित येतात. गिरगावातील झावबावाडी क्रांतीनगर, ऑपेरा हाउस, प्रार्थना समाज या ठिकाणावरून भक्तगण देवीच्या दर्शनाला येतात. कोकण, गोव्यातून देवीच्या दर्शनासाठी भाविक येत असल्याची माहिती मंडळाचे उपाध्यक्ष देवांग शहा यांनी दिली.

दरवर्षी आम्ही शाडूच्‍या मातीपासून मूर्ती बनवतो. नऊ दिवस या ठिकाणी तरुण-तरुण एकत्र येऊन देवीची पूजा अर्चा करतात. हिंदू परंपरेचे जतन होण्यासाठी मंडळाच्या वतीने अनेक कार्यक्रम घेतले जातात.
– साई प्रकाश पेडणेकर, मूर्तिकार

गेले नऊ दिवस मी देवीची पूजा, देवीचे वस्त्र अलंकार बदलते. देवीच्या दर्शनासाठी दूरवरून भाविक येतात.
– वैष्णवी शिंदे, भक्त