शेतकऱ्यांना दिलासा देण्यासाठी पंचनामे सुरु

शेतकऱ्यांना दिलासा देण्यासाठी पंचनामे सुरु
कर्जत, ता.१(बातमीदार) ः तालुक्यात प्रामुख्याने भातशेती केली जाते. मात्र २६ सप्टेंबरपासून झालेल्या अवकाळी व मुसळधार पावसामुळे शेतकऱ्यांचे मोठे नुकसान झाले. या पार्श्वभूमीवर तहसीलदार धनंजय जाधव यांनी तातडीने पुढाकार घेत २०८ गावांची यादी तयार केली असून संबंधित गावांमध्ये कृषी अधिकारी, महसूल अधिकारी व ग्रामपंचायत अधिकाऱ्यांना पंचनामे करण्याचे आदेश देण्यात आले आहेत. किसान क्रांती संघटना तसेच विविध संघटनांनी,पत्रकार यांच्या बातम्या यातून त्वरित पंचनाम्यांची मागणी शेतकऱ्यांच्या वतीने करण्यात आली होती. त्याची दखल घेत प्रशासनाने मंगळवार (ता.३०) सप्टेंबरपासून पंचनाम्यांना सुरुवात केली आहे.सध्या महसूल, कृषी व पंचायत समिती यांच्या संयुक्त टीमकडून प्रत्यक्ष शेतात जाऊन पंचनामे केले जात आहेत. कर्जत तालुक्यातील भातशेतीचे प्रचंड नुकसान लक्षात घेता, प्रशासनाकडून त्वरित दिलासा मिळावा अशी अपेक्षा शेतकऱ्यांनी व्यक्त केली आहे.