वाडा तालुक्यातील कुवारीपाड्याला न्याय द्या

वाडा, ता. १ (बातमीदार) : तालुक्यातील कळंभे ग्रामपंचायत हद्दीतील कुवारीपाडा येथील ग्रामस्थांना स्वातंत्र्यापासून आजपर्यंत कुठल्याही मूलभूत सुविधा उपलब्ध झाल्या नाहीत. या पाड्यातील ग्रामस्थांनी सामाजिक कार्यकर्ते शरद पाटील व अर्जुन खरपडे यांच्या नेतृत्वाखाली पालघर जिल्ह्याचे पालकमंत्री गणेश नाईक यांची विक्रमगड येथे नुकतीच भेट घेऊन निवेदन दिले.

कुवारी पाडा शंभर टक्के आदिवासी लोकवस्तीचा असून, ११० जण राहतात. हा पाडा जंगलामध्ये वसलेला असून, पिण्याच्या पाण्याची सेवा नाही. ग्रामस्थ खड्ड्यातील पाणी पितात. त्याचे अनेक दुष्परिणाम त्यांना भोगावे लागतात. कळंभे गाव ते कुवारीपाडा हे अंतर आठ किमीचे आहे. रस्ता जंगलातून जातो, मात्र वनखाते रस्ता करू देत नाही. त्यामुळे आठ किमीचा हा प्रवास खडतररीत्या करावा लागतो. गावामध्ये अंगणवाडी वा अन्य इमारती बांधकामाला परवानगी दिली जात नाही. विजेची व्यवस्था नाही. अनेक मूलभूत सोयींपासून हा आदिवासी पाडा वंचित आहे. त्याचा विद्यार्थ्यांवर परिणाम होतो. त्याबाबतचे निवेदन पालकमंत्र्यांना देऊन समस्या सोडवण्याचे साकडे ग्रामस्थांनी पालकमंत्र्यांना घातले आहे. कुवारी पाड्याच्या समस्या सुटाव्यात, म्हणून पालकमंत्री गणेश नाईक यांनी जिल्हाधिकाऱ्यांना आदेश दिले आहेत.