नवी मुंबईत अभिजात मराठी भाषेचा जागर

नवी मुंबईत अभिजात मराठी भाषेचा जागर
भाषेचा गौरव वाढविण्यासाठी महापालिकेचे विविध उपक्रम
वाशी, ता. १ (बातमीदार) ः नवी मुंबई महापालिका अभिजात मराठी भाषेला प्रोत्साहन देण्यासाठी एक महत्त्वाकांक्षी “अभिजात मराठी भाषेचा जागर” या उपक्रमाचे आयोजन करत आहे. महापालिका आयुक्त डॉ. कैलास शिंदे यांच्या मार्गदर्शनाखाली विविध साहित्यिक आणि सांस्कृतिक कार्यक्रम घेऊन मराठी भाषेची अभिजातता व तिचा वैभव नागरिकांपर्यंत पोहोचविण्याचा पालिकेचा मानस आहे.
या मोहिमेचा पहिला टप्पा म्हणजे ३ ऑक्टोबर रोजी ‘अभिमान मराठी’ या विषयावर व्याख्यानाने होणार आहे. या व्याख्यानाचे आयोजन महापालिका मुख्यालयाच्या तिसऱ्या मजल्यावरील ज्ञानकेंद्रात सकाळी ११ वाजता होणार आहे. साहित्य अकादमी, नवी दिल्लीचे शासकीय सदस्य व सुप्रसिद्ध साहित्यिक व व्याख्याते डॉ. प्रा. नरेंद्र पाठक हे या व्याख्यानाचे प्रमुख वक्ते असणार आहेत. यानंतर ७ ऑक्टोबर रोजी लेखक व गझलकार जनार्दन म्हात्रे अभिजात मराठीचे शुद्धलेखन, या विषयावर सादरीकरण करणार आहेत. या सत्राद्वारे मराठी भाषेतील शुद्धलेखनाच्या महत्त्वाची जाणीव निर्माण होण्यास मदत होणार आहे. अभिजात मराठी भाषेला प्रोत्साहन देण्याच्या उद्देशाने एक अभिनव स्पर्धा मराठी भाषा व साहित्य प्रश्नमंजुषा आयोजित करण्यात येत आहे. ८ ऑक्टोबर रोजी सकाळी ११ वाजता पार पडणाऱ्या या स्पर्धेत पालिका अधिकारी, कर्मचारी तसेच साहित्यप्रेमी नागरिक सहभागी होऊ शकतात. स्पर्धेत उपस्थितांना मराठी भाषा व साहित्याशी संबंधित प्रश्न विचारले जातील आणि योग्य उत्तरे देणाऱ्यांना कार्यक्रमस्थळी पुस्तक स्वरूपात पारितोषिक दिले जाईल. यानंतर ९ ऑक्टोबर रोजी आणखी एक सांस्कृतिक उपक्रम म्हणजे काव्यवाचन स्पर्धा आयोजित केली जाणार आहे. यात सहभागी व्यक्तींनी अभिजात मराठी भाषेतील आवडती कविता कमाल पाच मिनिटांत सादर करणे आवश्यक आहे. या स्पर्धेद्वारे मराठी कवितेची समृद्ध परंपरा जिवंत राहील व मराठी भाषेच्या वैभवाचे व वैविध्यपूर्ण शब्दलालित्याचे प्रसार साधला जाईल. या सर्व उपक्रमांत सहभागी होण्यासाठी इच्छुकांनी ६ ऑक्टोबरपर्यंत ९९२०३७८५७४ किंवा ९९३००२०८१४ या क्रमांकावर नोंदणी करणे आवश्यक आहे. आयोजकांनी स्पष्ट केले आहे की, नोंदणीशिवाय स्पर्धेत प्रवेश दिला जाणार नाही.