अनधिकृत बांधकाम यादीत इच्छुक उमेदवारांची नावे

अनधिकृत बांधकाम यादीत इच्छुक उमेदवारांची नावे
राजकीय वर्तुळात खळबळ; नागरिक आश्चर्यचकित
खारघर, ता. १ (बातमीदार) : पनवेल महापालिकेच्या आगामी निवडणुकीच्या पार्श्वभूमीवर सिडकोने प्रसिद्ध केलेल्या अनधिकृत बांधकामांच्या यादीमुळे राजकीय वर्तुळात खळबळ माजली आहे. या यादीत काही माजी नगरसेवक, माजी ग्रामपंचायत सदस्य आणि निवडणूक लढविण्यास इच्छुक असलेल्या व्यक्तींची नावे समोर आल्याने नागरिकांनी आश्चर्य व्यक्त केले असून, विरोधकांना मात्र हे प्रकरण आयते कोळीत मिळाल्याचे बोलण्यात येत आहे.
सिडकोच्या अनधिकृत बांधकाम नियंत्रण विभागाकडून नुकतीच वर्तमानपत्रात नोटीस प्रसिद्ध करण्यात आली. त्यानुसार नवी मुंबई, पनवेल परिसरातील अनधिकृत बांधकामे १५ दिवसांत स्वतःहून काढून टाकण्याचे आवाहन करण्यात आले आहे. या नोटिशीत खारघर, ओवे आणि तळोजा परिसरातील १५ हून अधिक व्यक्तींनी अनधिकृत बांधकाम केल्याचे स्पष्ट झाले आहे. त्यात दोन माजी नगरसेवक व माजी ग्रामपंचायत सदस्यांचा समावेश असून, यांपैकी काही जण आगामी निवडणुकीसाठी तयारी करत आहेत. पूर्वीही अनधिकृत बांधकाम केलेल्या सदस्यांविरोधात नागरिकांनी न्यायालयीन लढा दिला होता. त्यानंतर न्यायालयाने संबंधित सदस्यांना अपात्र ठरवल्याच्या घटना घडल्या आहेत. त्यामुळे या वेळी अशीच परिस्थिती उद्भवणार का, याची चर्चा सुरू आहे. पनवेल महापालिकेची निवडणूक काही महिन्यांत होणार असून, खारघर हा पालिका हद्दीतील सर्वात मोठा नोड आहे. खारघरमधून तब्बल १२ नगरसेवक निवडून जाणार असल्यामुळे येथे राजकीय स्पर्धा चुरशीची होण्याची शक्यता आहे, पण अशा यादीमुळे इच्छुक उमेदवारांची विश्वासार्हता धोक्यात येत असून, नागरिकांमध्ये नाराजीचा सूर उमटला आहे.
.............
विरोधकांचा हल्लाबोल
दरम्यान, विरोधकांनी सत्ताधाऱ्यांवर हल्लाबोल सुरू केला आहे. पाच वर्षांत सत्ताधाऱ्यांनी कोणतेही ठोस विकासकाम केलेले नाही. खारघरमध्ये लाखो रुपये खर्च करून केलेले रस्त्यांचे डांबरीकरण पावसाळ्यात उखडून गेले. नागरिक आजही खड्ड्यातून प्रवास करत आहेत. पाणीपुरवठ्याचा प्रश्न कायम आहे. या सगळ्या बाबी माहिती अधिकारातून उघड करणार आहोत, अशी भूमिका विरोधी पक्षातील कार्यकर्त्यांनी घेतली आहे.