कल्याणमधील के. सी. गांधी शाळेचा अजब फतवा

टिळा आणि बांगड्यांना बंदी
कल्याणमधील के. सी. गांधी शाळेचा अजब फतवा; पालकांची शिक्षण विभागाकडे तक्रार
सकाळ वृत्तसेवा
डोंबिवली, ता. १ ः कल्याण येथील श्रीमती के. सी. गांधी शाळेने विद्यार्थ्यांसाठी घातलेल्या एका अजब नियमामुळे पालक आणि विद्यार्थ्यांमध्ये तीव्र अस्वस्थता पसरली आहे. शाळेने मुलींना टिकली, हातात बांगड्या आणि मुलांना कपाळाला टिळा तसेच हाताला धागा (गंडा) बांधण्यास मज्जाव केला आहे.
शाळेत टिकली किंवा टिळा लावून गेल्यास तो स्वच्छतागृहात पुसून काढायला लावला जातो आणि बांगड्या काढायला सांगतात, अशा तक्रारी पालक व विद्यार्थ्यांनी केल्या आहेत. या फतव्याप्रकरणी उद्धव बाळासाहेब ठाकरे पक्षाचे कल्याण विधानसभा संघटक रूपेश भोईर यांनी पालिका शिक्षण विभागाकडे तक्रार करून कारवाईची मागणी केली आहे. तक्रार मिळाल्यानंतर कल्याण-डोंबिवली महानगरपालिका शिक्षण विभागाचे शिक्षणाधिकारी भारत बोरनारे यांनी शाळेला नोटीस पाठवून खुलासा मागवला आहे. हा विषय सामंजस्याने सोडवण्याचे आश्वासन त्यांनी दिले आहे.

शाळेचे म्हणणे
शाळेचे सेक्रेटरी मनोहर पालन यांनी सांगितले, की शाळेत सर्वधर्मीय विद्यार्थी शिकतात आणि सर्वजण समान आहेत. आलेल्या तक्रारींची योग्य चौकशी करून शाळेच्या नियमांनुसार योग्य निर्णय घेतला जाईल.

निकालासाठी चर्चा
पालक, ठाकरे गटाचे भोईर आणि स्थानिक पोलिसांनी बुधवारी (ता. १) शाळा व्यवस्थापन समितीची भेट घेऊन हा निर्णय मागे घेण्याची मागणी केली. समितीने चर्चा करून योग्य निर्णय घेण्याचे आश्वासन दिले आहे.