म्हाडाच्या दुकानांची आता रेडिरेकनच्या दराने विक्री

म्हाडाच्या दुकानांची आता रेडिरेकनरच्या दराने विक्री

सकाळ वृत्तसेवा
मुंबई, ता. १ : म्हाडाकडून उभारल्या जाणाऱ्या इमारतींमध्ये निवासी गाळ्यांबरोबरच व्यावसायिक गाळेही तयार केले जात आहेत. या गाळ्यांची विक्री यापुढे व्यावसायिक रेडिरेकनर दराच्या शंभर टक्के किंवा निवासी रेडिरेकनर दराच्या १५० टक्के यापेक्षा जी जास्त असेल ती किंमत लिलावासाठी मूळ (बेस) किंमत निश्चित करून विक्री केली जाणार आहे. त्यासाठी म्हाडा प्राधिकरणाने ठराव केला आहे. त्यामुळे भविष्यात म्हाडाच्या दुकानांची खरेदी करण्यास इच्छुक असलेल्यांना मोठा दिलासा मिळणार आहे.
म्हाडाच्या मुंबई मंडळाने नुकतीच १४० हून अधिक दुकानांच्या विक्रीसाठी ई-लिलाव जाहीर केला होता. त्यामध्ये किमती जास्त असल्याने अर्ध्याहून अधिक दुकानांना बोलीच लागली नव्हती. हाच अनुभव इतर ठिकाणी येत आहे. त्यामुळे यापुढे व्यावसायिक गाळे रेडिरेकनर दराच्या शंभर टक्के किंवा निवासी रेडिरेकनर दराच्या १५० टक्के यापेक्षा जी जास्त असेल ती किंमत लिलावासाठी मूळ किंमत ठेवावी, असे प्राधिकरणाने स्पष्ट केले आहे. दरम्यान, म्हाडाने एखाद्या ठिकाणच्या गाळ्याचा दोन वेळा ई-लिलावमध्ये समावेश करूनही त्याची विक्री न झाल्यास त्यानंतर पुन्हा लिलावमध्ये समावेश करू नये. हे गाळे प्रथम येणाऱ्यास प्राधान्य या तत्त्वाने विक्री करावेत, असाही म्हाडा प्राधिकरणामध्ये ठराव झाला आहे.