१०२ वर्षीय डॉ. मोहन परमार यांचे देहदान

१०२ वर्षीय डॉ. परमार यांचे देहदान
राज्यातील सर्वात वयोवृद्ध दात्याचा मान
विरार, ता. १ (बातमीदार) ः मुलुंड येथील डॉ. मोहन नाथुलाल परमार (वय १०२) यांनी मृत्यूनंतर वैद्यकीय शिक्षण आणि संशोधनासाठी देहदान करून समाजापुढे आदर्श निर्माण केला आहे. डॉ. परमार हे देहदान करणाऱ्या राज्यातील सर्वात वयोवृद्ध दात्यांपैकी एक ठरले आहेत.
डॉ. परमार यांचे मंगळवारी (ता. ३०) पहाटे निधन झाले. त्यांचे सुपुत्र डॉ. विक्रम परमार यांनी देहदानासाठी ‘दि फेडरेशन ऑफ ऑर्गन अँड बॉडी डोनेशन’चे अध्यक्ष पुरुषोत्तम पवार यांच्याशी संपर्क साधला. डॉ. पवार यांनी परमार यांच्या मृत्यूनंतर ३० तासांनी गुंतागुंतीची प्रक्रिया यशस्वी केली. त्यानुसार डॉ. परमार यांचा देह बुधवारी सकाळी नऊ वाजता नायर हॉस्पिटलच्या शरीरविज्ञान शास्त्र विभागाकडे सुपूर्द करण्यात आला. विभागप्रमुख डॉ. युवराज भोसले यांनी १०० वर्षांहून अधिक वयाच्या या महादानी देहदात्यास वंदन केले. डॉ. परमार यांचे हे अंतिम औदार्य संपूर्ण समाजासाठी कायम प्रेरणास्रोत ठरेल, अशी भावना पुरुषोत्तम पवार यांनी व्यक्त केली.