मराठी भाषेचा विकास साधणे ही प्रत्येकाची जबाबदारी ः डॉ. नरेंद्र पाठक

मराठी भाषेचा विकास साधणे ही प्रत्येकाची जबाबदारी ः डॉ. नरेंद्र पाठक
वाशी, ता. ४ (बातमीदार) ः मराठी भाषेचा अभिजात जपणे आणि तिचा विकास साधणे, ही प्रत्येकाची जबाबदारी आहे, असे साहित्यिक व साहित्य अकादमी, नवी दिल्लीचे सदस्य डॉ. नरेंद्र पाठक यांनी अभिजात मराठी, अभिमान मराठी या विषयावर मनोगत व्यक्त करताना सांगितले. अभिजात मराठी भाषेला सरकारी मान्यता मिळाल्याच्या वर्षपूर्तीच्या निमित्ताने नवी मुंबई महापालिकेच्या वतीने ज्ञानकेंद्रात विशेष कार्यक्रम आयोजित करण्यात आला.
या वेळी डॉ. पाठक म्हणाले की, मराठी भाषेचे अभिजातपण ही खरी संपत्ती आहे आणि तिचा उपयोग केवळ सन्मानासाठीच नव्हे, तर तिच्या विकासासाठीदेखील आवश्यक आहे. भाषेचा दररोजचा वापर व तिचे संवर्धन या दोन बाबींवर भर दिला पाहिजे. तमिळ भाषिकांनी त्यांच्या भाषेसाठी केलेला प्रयत्न हा मराठी समाजासाठी प्रेरणादायी ठरावा, अशी अपेक्षा त्यांनी व्यक्त केली.
त्यांनी गाथा सप्तशतीतील उदाहरण देऊन प्राचीन साहित्य व संस्कृतीची ओळख, तसेच त्यातून शिकण्याचे महत्त्व अधोरेखित केले. मराठी भाषेच्या जपणुकीसाठी घरांत, वसाहतींमध्ये, कार्यालयात मराठीचा वापर वाढवण्याचा आग्रह त्यांनी व्यक्त केला. त्यांनी नवी पिढी मराठीशी जोडण्यासाठी अर्थजन्य संधी निर्माण करण्याची आवश्यकता सांगितली. कार्यक्रमात महापालिका आयुक्त डॉ. कैलास शिंदे यांच्या मार्गदर्शनाखाली मराठी भाषेच्या संवर्धनाचे महत्त्व अधोरेखित केले गेले. डॉ. पाठक यांनी कविवर्य कुसुमाग्रजांच्या भाषा मरता देशही मरतो, या उक्तीला उद्धृत करून म्हटले की, मराठी बोलणे, लिहिणे आणि जपणे ही संस्कृती जपण्याची खरी गुरुकिल्ली आहे.