डी-नोव्हाच्या कुलगुरूपदांचे आदेश जारी

‘डी-नोव्हा’च्या कुलगुरूपदांचे आदेश जारी
शिमला येथील डॉ. हिम चटर्जी यांच्या नावावर शिक्कामोर्तब

सकाळ वृत्तसेवा : संजीव भागवत
मुंबई, ता. ४ : राज्य कला संचालनालयाअंतर्गत असलेल्या वास्तुकला, फाइन आणि कमर्शियल आर्टच्या तीन महाविद्यालयांना एकत्रित करून नव्याने स्थापन झालेल्या ‘सर जे. जे. स्कूल ऑफ आर्ट, आर्किटेक्चर अँड डिझाइन’ (अभिमत स्तरावरील डी-नोव्हो विद्यापीठ) या विद्यापीठाच्या कुलगुरूपदांच्या नियुक्तीचे आदेश उच्च व तंत्रशिक्षण विभागाने जारी केले आहेत. सिमला येथील डॉ. हिम चटर्जी यांची या विद्यापीठाच्या कुलगुरूपदी नियुक्ती करण्यात आली आहे.

जे. जे. डी-नोव्हो विद्यापीठाच्या कुलगुरूपदी डॉ. हिम चटर्जी यांची नियुक्ती होणार असल्याचे वृत्त ‘सकाळ’ने ३ ऑक्टोबर रोजी प्रसिद्ध केले होते. त्यानंतर विभागाकडून तातडीने यासंदर्भातील रखडून ठेवलेला आदेश जारी करीत डॉ. चटर्जी यांची नियुक्ती केल्याचे जाहीर केले. चटर्जी यांच्या नियुक्तीमुळे या विद्यापीठाला पूर्णवेळ कुलगुरू मिळण्याचा मार्ग मोकळा झाला आहे. गेल्या दीड वर्षात या विद्यापीठाचे पहिले कुलगुरू म्हणून डॉ. होमी भाभा राज्य विद्यापीठाचे कुलगुरू डॉ. रजनीश कामत यांनी कामकाज पाहिले होते. त्यांनी या विद्यापीठात अनेक नवीन अभ्यासक्रम सुरू केले आहेत. आता डॉ. चटर्जी यांच्या माध्यमातून या विद्यापीठाला पूर्णवेळ कुलगुरू मिळाला आहे. या विद्यापीठाच्या नवीन कुलगुरूंच्या नियुक्तीसाठी राज्य सरकारने महाराजा गंगा सिंग विद्यापीठाचे (राजस्थान) कुलगुरू मनोज दीक्षित यांच्या अध्यक्षतेखाली समिती स्थापन केली होती. या समितीत सावित्रीबाई फुले पुणे विद्यापीठाचे माजी कुलगुरू प्रा. नितीन आर. करमळकर आणि मुंबई वि‌द्यापीठाचे कुलगुरू डॉ. रवींद्र कुलकर्णी यांचा समावेश होता. या समितीकडे आलेल्या ३० हून अधिक अर्जांपैकी समितीने सात उमेदवारांच्या मुलाखती घेतल्या. यामधील तीन नावांची सरकारकडे शिफारस करण्यात आली. त्यानुसार हिम चटर्जी यांची नियुक्ती करण्यात आली आहे.

कोण आहेत डॉ. चटर्जी
हिम चटर्जी हे सध्या हिमाचल प्रदेश विद्यापीठ, शिमला येथील व्हिज्युअल आर्ट्स विभागाचे प्राध्यापक आणि विभागप्रमुख म्हणून कार्यरत आहेत. भित्तिचित्रे (म्युरल्स), चित्रकला, रेखाचित्रे आणि स्केचेस या क्षेत्रातील त्यांच्या कार्यासाठी ते सुप्रसिद्ध आहेत. त्यांनी शिमला येथील हियुन गावात चॅडविक फॉलजवळ पहिली व्यावसायिक समकालीन (कॉन्टेम्पररी) आर्ट गॅलरी व रेसिडेन्सी सुरू केली. त्यांच्या कारकिर्दीत त्यांनी १०० हून अधिक भित्तिचित्रे व कलाकृती देशभरात तयार करून विविध ठिकाणी त्यांचे प्रदर्शन मांडले होते. व्हिज्युअल आर्ट्स क्षेत्रात त्यांचे योगदान व्यापक असून, त्यांना विविध पुरस्कारांनी सन्मानित करण्यात आले आहे. तसेच त्यांना राष्ट्रीय स्तरापासून ते विश्व हिंदू परिषद आणि इतर संस्थांकडून पुरस्कार मिळाले आहेत. त्यांनी हिमाचल प्रदेशचे उद्योग व सांस्कृतिक विभाग यांच्यासाठी कला सल्लागार, क्युरेटर म्हणूनही काम केले आहे.