वाडा तालुक्यातील अल्पवयीन मुलींच्या जबरदस्ती लग्नाचा प्रकार

वाड्यात अल्पवयीन मुलींचे सक्तीने लग्न
५० हजार ते १.२५ लाख रुपये देवाणघेवाण; पतीसह सहा आरोपींवर गुन्हा
वाडा, ता. ४ (बातमीदार) : वाडा तालुक्यात आदिवासी कातकरी समाजातील अल्पवयीन मुलींचे जबरदस्तीने विवाह आणि ५० हजार ते १.२५ लाख रुपयांत मुलींची आर्थिक देवाणघेवाण करण्याचे धक्कादायक प्रकार उघडकीस आले आहेत. याप्रकरणी वाडा पोलिस ठाण्यात गुरुवारी (ता. २) पतीसह सहा आरोपींविरुद्ध गुन्हा दाखल करण्यात आला असून, तपास सुरू आहे.
पीडितेच्या तक्रारीनुसार, मुलगी अवघ्या १४ वर्षांची असताना जीवन बाळासाहेब गाडे (संगमनेर, जि. अहिल्यानगर) याच्याशी तिचे बळजबरीने लग्न लावण्यात आले. लग्नासाठी तिच्या कुटुंबीयांना धमक्या देऊन ५० हजार रुपयांची रोख देवाणघेवाण करून मुलीची विक्री करण्यात आली. लग्नानंतर पतीने पीडितेला जबरदस्तीने गरोदर केले आणि मुलगी झाल्यावर छळ वाढवला. तसेच गर्भधारणेच्या नोंदीसाठी पतीने पीडितेचे बनावट आधार कार्ड तयार करून जन्मतारीख बदलली.
याप्रकरणी पती जीवन बाळासाहेब गाडे याच्यासह अमोल गाडे (चुलत सासरे), बाळासाहेब गाडे (सासरे), दोन चुलत सासू आणि एक नातेवाईक महिला यांचा आरोपींमध्ये समावेश असून, मध्यस्थी करणारा आरोपी रवि कृष्णा कोर याला पोलिसांनी ताब्यात घेतले आहे. गुन्ह्याचा तपास पोलिस उपनिरीक्षक सुमेध मेढे यांच्या मार्गदर्शनाखाली सुरू असून, अधिक तपास जव्हारचे उपविभागीय पोलिस अधिकारी एस. एस. महेर आणि तपास अधिकारी पोलिस निरीक्षक दत्तात्रेय किंद्रे करीत आहेत.

विक्रीची मोठी साखळी
श्रमजीवी संघटनेच्या तपासानुसार, बुधावली कातकरी वाडीतील अजून चार मुलींची अकोले भागात एक लाख ते सव्वा लाख रुपये घेऊन विक्री केल्याचे समोर आले आहे. श्रमजीवी संघटना महाराष्ट्रचे संस्थापक विवेक (भाऊ) पंडित यांच्या मार्गदर्शनाखाली संघटनेने हा प्रकार उघडकीस आणला. कर्जबाजारी आणि दारिद्र्याने पिचलेल्या कातकरी समाजात दलालांमार्फत अल्पवयीन मुलींची विक्री वाढत असल्याबद्दल संघटनेने चिंता व्यक्त केली आहे. जिल्हा प्रशासनाने संबंधित दलालांवर तत्काळ गुन्हे दाखल करावेत अन्यथा श्रमजीवी संघटनेतर्फे तीव्र आंदोलन करण्यात येईल, असा इशारा संघटनेचे जिल्हा अध्यक्ष सुरेश रेंजड यांनी दिला आहे.