सव्वा कोटींचे एमडी जप्त

मिरा रोड येथे सव्वा कोटीचे एमडी जप्त
भाईंदर, ता. ४ (बातमीदार) ः अमली पदार्थविरोधी विभागाने मिरा रोड, हटकेश परिसरात मोठी कारवाई करत सुमारे एक कोटी ३२ हजार रुपये किमतीचा ५०१.६ ग्रॅम वजनाचा मेफेड्रोन हा अमली पदार्थ जप्त केला आहे. याप्रकरणी पोलिसांनी सहा जणांना ताब्यात घेतले आहे.
काशिगाव पोलिस ठाण्याच्या हद्दीत शुक्रवारी (ता. ३) मध्यरात्री अमली पदार्थविरोधी पथक गस्त घालत असताना, हटकेशकडे जाणाऱ्या रस्त्यावर त्यांना सहा व्यक्ती संशयास्पद स्थितीत आढळल्या. त्यांची झडती घेतल्यावर त्यांच्याकडे एमडी हा अमली पदार्थ आढळून आला. त्यांच्याकडून चार दुचाकी आणि आठ मोबाईल फोन असा मुद्देमालही जप्त करण्यात आला आहे.