अपघातप्रवण क्षेत्रांवरील दुर्घटना रोखण्यासाठी मोहीम

मनोर, ता. ७ (बातमीदार) : मुंबई-अहमदाबाद महामार्गावरील अपघातप्रवण क्षेत्रात होणारी दुर्घटना रोखण्यासाठी जिल्हा वाहतूक शाखेच्या वतीने जनजागृती अभियान राबवण्यात आले. जिल्हा वाहतूक शाखेच्या कर्मचाऱ्यांनी महामार्गावरील अपघातप्रवण क्षेत्रांच्या ठिकाणी भेट देत उपस्थित वाहनचालकांना मोटार वाहन कायद्याची माहिती दिली तसेच नियमांचे पालन करण्याचे आवाहन केले.

मुंबई-अहमदाबाद महामार्गावर जव्हार फाटा, वाडा खडकोना पेट्रोलपंप, हालोली, सातिवली आणि ढेकाळे वाघोबा खिंड अशी अपघातप्रवण क्षेत्रे आहेत. या क्षेत्रात अपघातांची संख्या मोठी आहे. दिवसेंदिवस दुर्घटना वाढत असल्यामुळे अपघात रोखण्यासाठी उपाययोजना करण्याचे निर्देश पालघरचे पोलिस अधीक्षक यतिश देशमुख यांनी जिल्हा वाहतूक शाखेच्या प्रभारी अधिकाऱ्यांना दिले होते. या निर्देशानुसार जिल्हा वाहतूक शाखेचे अंमलदार योगेश कमलेकर यांनी महामार्गावरील अपघातप्रवण ठिकाणी भेट दिली. कारचालकांनी सीटबेल्टचा वापर, दुचाकीस्वारांनी हेल्मेट परिधान करण्यासह वळण रस्त्यांवर वाहनांचा वेग कमी केल्यास अपघात टाळता येतात असे सांगत वाहतूक नियमांची माहिती दिली.