बनावट अंगठ्या गहाण ठेऊन सोनारांना गंडा

बनावट अंगठ्या गहाण ठेवून सोनारांना गंडा
कल्याण, ता. ६ (बातमीदार) : बनावट अंगठ्या गहाण ठेवून सोनारांची आर्थिक फसवणूक करणाऱ्या दुकलीला महात्मा फुले पोलिसांनी ताब्यात घेतले आहे. पती आजारी असल्याचे भासवत उपचारासाठी तत्काळ पैसे हवेत, असे सांगून बनावट अंगठ्या गहाण ठेवून दुकलीने दोन व्यापाऱ्यांची आर्थिक फसवणूक केली आहे. यासंदर्भात दोघांची चौकशी सुरू असून, पोलिसांना यामागे टोळी सक्रिय असल्याचा संशय आहे.

कल्याण शहरातील पंकज ज्वेलर्समधून बुधवारी (ता. १) मयूर पाटोळे (वय ३४) व अश्विनी शेवाळे ( ३२) यांनी हॉलमार्क असलेली बनावट अंगठी गहाण ठेवून रक्कम घेतली. पुढील दोनच दिवसांत शुक्रवारी (ता. ३) याच परिसरातील संघवी ज्वेलर्समधूनही त्यांनी दुसरी अंगठी गहाण ठेवून पैसे घेतले. सोनाराला संशय आल्याने अंगठी घेऊन पंकज ज्वेलर्स यांच्याकडे आला असता दोन्ही अंगठ्या सारख्याच असल्याचे आढळून आले. यानंतर अंगठीची पडताळणी केली असता सदर अंगठी ही सोन्याची नसून चांदीची असल्याची बाब त्यांच्या निदर्शनास आली. यासंदर्भात महात्मा फुले पोलिस स्थानकात गुन्हा दाखल केला असून, सदर जोडप्याला सीसीटीव्हीच्या आधारे ओळख पटवून ताब्यात घेण्यात आले आहे. बनावट अंगठीवर नामांकित हॉलमार्क छाप आरोपींना कसा व कुठून मिळाला, असा सवाल दागिने व्यापाऱ्यांनी केला असून, पोलिस त्या दृष्टीनेही तपास करीत आहेत. यामागे एखादी टोळी सक्रिय असण्याची शक्यता असून, हॉलमार्क छापून बनावट दागिने बाजारात आणण्याचा हा नवा हातखंडा नेमका कुठून सुरू झाला आहे? याचाही तपास पोलिस करीत आहेत. अशाप्रकारे फसवणूक होऊ लागल्याने दागिने व्यापाऱ्यांमध्ये खळबळ उडाली आहे.