अकलोली कुंड येथे लॉज व्यावसायिकांवर कारवाई

वज्रेश्वरी, ता. ६ (बातमीदार) : भिवंडी तालुक्यातील तीर्थक्षेत्र वज्रेश्वरी-अकलोली कुंड परिसरातील काही लॉजमध्ये अल्पवयीन मुलींना प्रवेश देणे आणि बेकायदा धंद्यांना आश्रय देण्याच्या प्रकारांवर पोलिसांनी मोठी कारवाई केली आहे. गणेशपुरी पोलिस ठाण्याचे सहाय्यक पोलिस निरीक्षक कमलेश बच्छाव यांनी अचानक तपासणी मोहीम हाती घेत तीन लॉज मालकांविरुद्ध कारवाई करून त्यांना शनिवारी (ता. ४) अटक केली आहे. या कारवाईमुळे परिसरातील बेकायदा लॉज व्यावसायिकांमध्ये खळबळ उडाली आहे.
वज्रेश्वरी, अकलोली कुंड आणि गणेशपुरी या तीर्थक्षेत्रात गेल्या काही काळात अवैध लॉजिंग व अनैतिक धंद्यांविरोधात तक्रारी वाढत होत्या. काही लॉजमध्ये अल्पवयीन मुलींना राहण्यासाठी प्रवेश देण्यात येत असल्याचे उघड झाल्यानंतर पोलिसांनी ही मोहीम हाती घेतली. गणेशपुरी उपविभागीय पोलिस अधिकारी राहुल झाल्टे यांच्या मार्गदर्शनाखाली बच्छाव यांच्या पथकाने सलग धाडी टाकून नोंदींची पडताळणी केली. अकलोली कुंड येथील भारती गेस्ट हाऊसचे मालक विजय नंदकुमार क्षत्रिय यांनी अल्पवयीन मुलींसाठी खोली उपलब्ध करून दिल्याचे निष्पन्न झाल्याने त्यांच्या विरोधात पोक्सो कायद्यानुसार दोन गुन्हे दाखल करून अटक केली. तर महेंद्र लॉज येथे अधिकृत नोंदणी न ठेवणे आणि रजिस्टर अनुपलब्ध असल्यामुळे कारवाई करण्यात आली आहे. या संपूर्ण प्रकरणाचा पुढील तपास पोलिस उपनिरीक्षक प्रदीप नाईक करीत आहेत.