मराठी स्वाक्षरी स्पर्धेत प्रज्वल वाघमारे प्रथम

मराठी स्वाक्षरी स्पर्धेत प्रज्वल वाघमारे प्रथम
कल्याण, ता. ७ (वार्ताहर): अभिजात मराठी भाषा सप्ताहानिमित्त सार्वजनिक वाचनालय, कल्याण यांच्यातर्फे मराठी स्वाक्षरी स्पर्धेचे आयोजन करण्यात आले. या अनोख्या उपक्रमात २०० वाचक व ३०० विद्यार्थ्यांनी उत्स्फूर्त सहभाग घेतला. बक्षीस वितरण समारंभ वाचनालयाच्या सभागृहात उत्साहात पार पडला. प्रमुख पाहुणे म्हणून अचिव्हर्स महाविद्यालयाचे प्राचार्य डॉ. महेश भिवंडीकर, स्वाक्षरी तज्ञ गोपाळ वाकोडे आणि गिनीज बुकात नोंद असलेले चित्रकार राजेश पवार उपस्थित होते. डॉ. भिवंडीकर यांनी भाषणात मराठी स्वाक्षरीचे महत्त्व अधोरेखित करत हा उपक्रम समाजात सकारात्मक बदल घडवेल असा विश्वास व्यक्त केला. गोपाळ वाकोडे व राजेश पवार यांनी प्रात्यक्षिकांद्वारे स्वाक्षरीचे विविध प्रकार सादर केले. स्पर्धेचे परीक्षण राजेश पवार यांनी केले. वाचक विभागात सुधीर चित्ते (प्रथम), किशोर शेळके (द्वितीय), निलेश बिरमोळे (तृतीय) तर शालेय विभागात श्रावणी येणारे, प्रज्वल वाघमारे आणि मितेश जाधव यांनी अनुक्रमे प्रथम, द्वितीय आणि तृतीय क्रमांक मिळवला.अध्यक्ष मिलिंद कुलकर्णी, सरचिटणीस भिकू बारस्कर आदी मान्यवर आणि प्रेक्षक मोठ्या संख्येने उपस्थित होते.

डॉ. महेश भिवंडीकर आपल्या भाषणात म्हणाले की, आजकाल मराठी स्वाक्षरी करणे हे जवळजवळ सर्वच जण विसरलेले आहेत. आपली मराठी भाषा ही अमृताहुनी गोड आहे. तिला अभिजात मराठी भाषेचा दर्जा प्राप्त झाला आहे. त्यामुळे आपले कर्तव्य आहे की, आपण आपले नित्य व्यवहाराची कामे मराठी भाषेतच करायला हवी. आज आपण स्वाक्षरी करताना मराठीत न करता इंग्रजीत करतो. त्यासाठी विद्यार्थी आणि पालकांना आदर्शवत होईल व ते आपली स्वाक्षरी मराठीतूनच करतील या उद्देशाने सार्वजनिक वाचनालय कल्याण आयोजित केलेला हा मराठी स्वाक्षरी स्पर्धेचा उपक्रम खूपच चांगला आहे. यामुळे मराठी स्वाक्षरी करण्याची बीजे पेरली जातील व येणाऱ्या काळात आपण सारे जण मराठीतून स्वाक्षरी करू असा आत्मविश्वास त्यांनी व्यक्त केला. यावेळी वाचनालयाचे अध्यक्ष मिलिंद कुलकर्णी, सरचिटणीस भिकू बारस्कर, कार्यकारणी सदस्य अरविंद शिंपी व मोठ्या संख्येने प्रेक्षक वर्ग तसेच वाचनालयाचा कर्मचारी वर्ग उपस्थित होता.