सोनसाखळी चोरणाऱ्या इराणी चोराच्या आवळल्या मुसक्या

सोनसाखळी चोरट्याच्या आवळल्या मुसक्या
कल्याण (ता. ७): सोनसाखळी चोरीतील एका सराईत इराणी चोरट्याला अखेर कल्याणच्या खडकपाडा पोलिसांनी शिताफीने अटक केली आहे. पनवेल शहर पोलिस ठाण्यात दाखल असलेल्या गुन्ह्यातील आरोपी सलमान साजिद जाफरी उर्फ ''इराणी'' (वय २८) याला पोलिसांनी ताब्यात घेतले असून, पुढील तपासासाठी पनवेल पोलिसांच्या स्वाधीन केले आहे.

पनवेल शहर पोलिस ठाण्याच्या पथकाने आरोपीचा शोध घेण्यासाठी कल्याण परिसरात हालचाली केल्या होत्या. पोलिस उपायुक्त अतुल झेंडे यांच्या परवानीनंतर सहायक पोलिस निरीक्षक विजय गायकवाड यांच्या मार्गदर्शनाखाली पोलीस हवालदार संदीप भोईर, योगेश बुधकर, राजू लोखंडे व पोलीस शिपाई महेश बगाड यांच्या पथकाने ही कारवाई केली. आरोपीने याआधी भिवंडी शहर पोलीस ठाणे, निजामपूरा, सहार (मुंबई) तसेच मुंबईतील इतर पाच-सहा पोलीस ठाण्यांच्या हद्दीत चेन स्नॅचिंगचे गुन्हे केले असल्याचे उघड झाले आहे. आरोपीविरुद्ध दाखल गुन्ह्यांची नोंद लक्षात घेता, त्याच्यावर मोठ्या प्रमाणात कारवाई होण्याची शक्यता आहे. सहाय्यक पोलिस आयुक्त कल्याणजी घेटे यांनी दिलेल्या माहितीनुसार, आरोपीचा गुन्हेगारी इतिहास गंभीर असून, त्याच्या मुसक्या आवळण्यात खडकपाडा पोलिसांचे महत्त्वाचे योगदान आहे.