बंटी बबलीसह साथीदाराला बेड्या

व्यापाऱ्याची फसवणूक करणाऱ्या दाम्पत्याला अटक
कल्याण महात्मा फुले पोलिसांनी बेड्या ठोकल्या
कल्याण, ता. ७ (वार्ताहर): चांदीच्या दागिन्यांवर सोन्याचा मुलामा लावून त्यावर हॉलमार्कचा शिक्का मारून बनावट दागिने गहाण ठेवून व्यापाऱ्याची फसवणूक करणाऱ्या बंटी-बबली दाम्पत्यासह त्यांच्या एका साथीदाराला कल्याण महात्मा फुले पोलिसांनी अटक केली आहे. अश्विनी शेवाळे आणि मयूर पाटोळे हे बंटी-बबली दाम्पत्य असून पुणे येथील शरण शिलवंत याला नकली हॉलमार्कचा शिक्का मारण्याच्या आरोपाखाली पोलिसांनी बेड्या ठोकल्या आहेत.

कल्याण पश्चिमेकडील मुख्य बाजारपेठेत एका व्यापाऱ्याला बंटी-बबलीने बनावट सोन्याच्या दागिन्यांवर बनावट हॉलमार्क लावून गहाण ठेवून हजारो रुपयांची फसवणूक केली होती. महात्मा फुले पोलिसांनी सीसीटीव्ही फुटेजच्या आधारे या आरोपींचा शोध घेत तात्काळ त्यांना अटक केली. आरोपींनी चांदीच्या दागिन्यांवर सोन्याचा मुलामा लावून ते सोन्याचे असल्याचे भासवले, तर धक्कादायक बाब म्हणजे या दागिन्यांवर खोटा हॉलमार्क शिक्का देखील होता.

पोलिस तपासात समोर आले की, हा हॉलमार्क पुण्यातील शरण शिलवंत नावाच्या व्यक्तीने बनवून दिला होता. महात्मा फुले पोलीसांच्या पथकाने पुण्यात सापळा रचून त्याला अटक केली. वरिष्ठ पोलिस निरीक्षक बळीरामसिंग परदेशी यांच्या मार्गदर्शनाखाली सहायक पोलिस निरीक्षक स्वप्नील भुजबळ, पोलिस हवालदार साळुंखे, किरपण, बडगावे, कोळी, जाधव यांनी या कारवाईत महत्त्वाची भूमिका बजावली आहे. या गुन्ह्याचा पुढील तपास किरपण करत आहे. सहाय्यक पोलिस आयुक्त कल्याणजी घेटे यांनी सांगितले की, या तिघांच्या कारवायांमुळे अजून किती जणांची फसवणूक झाली आहे, याचा सखोल तपास सुरु आहे.