दोन दिवस झाडावर लटकलेल्या घारीची सुटका

दोन दिवस झाडावर लटकलेल्या घारीची सुटका!
प्राथमिक उपचारानंतर घार नैसर्गिक अधिवासात मुक्त

डोंबिवली, ता. ७ : डोंबिवली पूर्वेकडील नांदिवली परिसरात पतंगाच्या मांजामध्ये अडकलेल्या एका घारीची अखेर दोन दिवसांनंतर सुखरूप सुटका करण्यात आली आहे. स्थानिकांनी दिलेल्या माहितीनुसार, ''पॉज'' संस्थेच्या कार्यकर्त्यांनी हा कठीण बचाव यशस्वी करून दाखवला.

नांदिवली परिसरातील एका झाडावर ही घार मांजामुळे अडकली असल्याची बाब जागरूक नागरिकांच्या निदर्शनास आली. स्थानिक नागरिकांनी तत्काळ मदतीसाठी पॉज संस्थेच्या हेल्पलाईनवर संपर्क साधला. घार धोकादायक उंचीवर अडकलेली असल्यामुळे तिची सुटका करणे आव्हानात्मक होते. पॉजचे कार्यकर्ते ऋषिकेश सुरसे यांनी संस्थेचे संस्थापक डॉ. निलेश भणगे यांच्या मार्गदर्शनाखाली संयम, कौशल्य आणि धाडसाच्या जोरावर घारीची सुरक्षित सुटका केली.
मांजामुळे घारीच्या पंखाला दुखापत झाली होती. पॉज संस्थेने तिच्यावर प्राथमिक उपचार केले आणि त्यानंतर तिला पुन्हा तिच्या नैसर्गिक अधिवासात सोडण्यात आले.

संस्थेचे संचालक डॉ. निलेश भणगे यांनी सांगितले की, पॉज ही ठाणे जिल्ह्यातील एक अग्रगण्य संस्था आहे. गेली २५ वर्षे ही संस्था वन्यजीव पुनर्वसनासाठी अहोरात्र काम करत आहे. या बचावकार्याबद्दल पॉजच्या टीमचे सर्वत्र कौतुक होत आहे.