पूरग्रस्तांना माय मराठी प्रतिष्ठानकडून मदत

पूरग्रस्तांसाठी ‘माय मराठी प्रतिष्ठान’कडून आर्थिक मदत
कल्याण, ता. ७ (वार्ताहर): कल्याण पश्चिम येथील माय मराठी प्रतिष्ठान, योगीधाम ही संस्था सामाजिक बांधिलकी जपत विविध उपक्रम राबवते. मराठी भाषेचे जतन, मराठी जनतेच्या हक्कांसाठी संस्था सातत्याने कार्यरत आहे. महाराष्ट्रात यावर्षी झालेल्या अतिवृष्टीमुळे विशेषतः मराठवाडा भागात मोठ्या प्रमाणावर पूरस्थिती निर्माण झाली. या पार्श्वभूमीवर ‘माय मराठी प्रतिष्ठान’ने सामाजिक जबाबदारी स्वीकारत पूरग्रस्तांना मदतीचा हात पुढे केला आहे. संस्थेच्या पदाधिकाऱ्यांनी मुख्यमंत्री सहायता निधी कक्षाच्या नावाने एकतीस हजार रकमेचा धनादेश कल्याणचे तहसीलदार सचिन शेजाळ यांच्याकडे औपचारिकरित्या सुपूर्द केला. यावेळी संस्थेचे अध्यक्ष नितीन जाधव, सचिव अतुल सरगर, खजिनदार जितेंद्र सावंत, तसेच पदाधिकारी अनिल जगताप आणि विनोद वीरकर उपस्थित होते. संस्थेने हे कार्य ‘खारीचा वाटा’ समजून केले असले, तरी सामाजिक जाणिवा आणि आपत्तीच्या काळातील एकजूट याचे हे उदाहरण निश्चितच प्रेरणादायी आहे.