अंबरनाथमध्ये वकिलांचे काम बंद आंदोलन

अंबरनाथ, ता. ७ (वार्ताहर) : सर्वोच्च न्यायालयात सरन्यायाधीश भूषण गवई यांच्या दिशेने बूट फेकण्याचा प्रयत्न करणाऱ्या धर्मांध वकिलाच्या घटनेविरोधात अंबरनाथ येथील चिखलोली न्यायालयात तालुका वकील संघटनेतर्फे मंगळवारी तीव्र निषेध नोंदविला. यावेळी वकिलांनी लाल फित बांधून आणि काळे कोट उतरवून निषेध व्यक्त केला. संबंधित वकिलावर कठोर कारवाई करावी आणि त्याची सनद रद्द करावी, अशी मागणी संघटनेने केली. या पार्श्वभूमीवर अंबरनाथ येथील वकिलांनी न्यायालयीन कामकाजापासून अलिप्त राहण्याचा एकमताने ठराव मंजूर केला.
सर्वोच्च न्यायालयातील न्यायमूर्तीवर चप्पल फेकण्याचा हा भ्याड हल्ला न्यायव्यवस्थेवरचाच आहे. ही घटना अत्यंत निंदनीय आहे. यावर तीव्र निषेध व्यक्त करत आहोत, असे वकिलांनी म्हटले. या घटनेनंतर उल्हासनगर न्यायालयात वकिलांनी एकमताने ठराव पास करून कामकाजापासून अलिप्त राहण्याचा निर्णय घेतला. अंबरनाथ येथील चिखलोली न्यायालयात संघटनेतर्फे काळी फित बांधून आणि कोट उतरवून निषेध व्यक्त केला. या वकिलाची सनद रद्द करावी आणि त्याला पुन्हा कोणत्याही न्यायालयात वकिली करण्याची संधी नाकारावी, अशी मागणी संजय सोनवणे यांनी केली.