ठामपा उपायुक्त शंकर पाटोळे पदोन्नती

ठामपा उपायुक्त शंकर पाटोळे पदोन्नती
सकाळ वृत्तसेवा
ठाणे, ता. ७ : ठाणे पालिकेच्या अतिक्रमण नियंत्रण विभागाचे उपायुक्त शंकर पाटोळे यांना लाचप्रकरणी लाचलुचपत प्रतिबंधक विभागाकडून अटक करण्यात आली. त्यानंतर पाटोळे यांना देण्यात आलेली पदोन्नती वादाच्या भोवऱ्यात सापडली असून, भाजप, शरद पवार गट आणि उद्धव सेनेने यावर आपल्या प्रतिक्रिया दिल्या आहेत. २५ लाखांची लाच घेताना पकडलेला अधिकारी प्रमोशन कसे घेतो, असा सवाल शरद पवार गटाचे आमदार जितेंद्र आव्हाड यांनी उपस्थित केला आहे. दुसरीकडे भाजपचे आमदार संजय केळकर यांनीदेखील या प्रकरणाची चौकशी झाली पाहिजे, अशी मागणी केली आहे. त्यामुळे शंकर पाटोळेवरून ठाण्यात राजकारण चांगलेच तापले आहे.
बांधकाम व्यावसायिकाकडून अतिक्रमणावर कारवाई टाळण्यासाठी ५० लाखांच्या लाचेची मागणी करण्यात आली होती. त्यापैकी २५ लाख रुपयांचा पहिला हप्ता घेताना पाटोळे आणि त्यांचा सहकारी ओमकार गायकर यांना पथकाने पकडले. याप्रकरणी उपायुक्त शंकर पाटोळे, महापालिकेत डेटा ऑपरेटर पदावर काम करणारा ओमकार गायकर आणि सुशांत सुर्वे या तिघांविरोधात नौपाडा पोलिस ठाण्यात गुन्हा दाखल झाला. यानंतर सुशांत यालाही अटक करण्यात आली. या कारवाईनंतर पालिकेच्या कारभारावर सर्वांकडून टीका होत आहे. अशातच आता शरद पवार गटाचे आमदार जितेंद्र आव्हाड यांनी लाचखोर अधिकारी प्रमोशन कसं घेतो? त्याची दोन वेळा चौकशी झाली, त्याचं काय झालं? शासनातून आलेले अधिकारी ठाण्यात येतात आणि शासनात परत जातच नाहीत. पुणे भ्रष्टाचारात पुढे कोणी असं म्हणत असेल, पण ठाणे त्याही पुढे गेलंय, असे आव्हाड म्हणाले. महापालिकेत आवडीचे अधिकारी आवडीच्या जागी वर्षानुवर्षे बसवले जातात. जे अधिकारी आवडतात त्यांनाच महत्त्वाच्या पदांवर बसवलं जातं, असा घणाघात आव्हाड यांनी केला. ठाण्यातील बेकायदा बांधकामांवरही त्यांनी संताप व्यक्त केला.
दरम्यान, भाजपचे आमदार संजय केळकर यांनीदेखील पाटोळे यांचा समाचार घेतला. पालिकेने आजवर कुणावरही कारवाई केली नाही. ज्या कारवाया झाल्या त्या कोर्टाच्या आदेशाने झाल्या आहेत. अशा घटनांमुळे ठाणेकरांना मान खाली घालावी लागत आहे. काही अधिकारी अशा पद्धतीने लूटमार करीत असून, पांघरून घालण्याचे काम करीत असल्याचा आरोप त्यांनी केला. काही आजी आणि माजी अधिकाऱ्यांच्या मालमत्तेची चौकशीही ईडीकडून केली पाहिजे, अशी मागणीही त्यांनी केली.