''कॅश व्हॅन'' कर्मचाऱ्यावर हल्ला

कॅश व्हॅन कर्मचाऱ्यावर हल्ला
नऊ लाखांची रोकड लुटली
अंबरनाथ, ता. ७ (वार्ताहर) : कल्याण-कर्जत मार्गावर असलेल्या चिखलोली हॉस्पिटलजवळ सोमवारी (दि. ७) सकाळी साडेअकराच्या सुमारास एका कॅश मॅनेजमेंट कंपनीच्या कर्मचाऱ्याला मारहाण करून मोटारसायकलवरून आलेल्या तीन अनोळखी इसमांनी त्याच्याकडील नऊ लाख ६२ हजार ७२० रुपयांची रोख रक्कम लुटून पळ काढला. दिवसाढवळ्या घडलेल्या या घटनेमुळे परिसरात एकच खळबळ उडाली आहे.

फिर्यादी कैलास ब्रह्मा सुरोशी (वय ४२) हे रेडीएंट कॅश मॅनेजमेंट सर्व्हिस प्रायव्हेट लिमिटेड या कंपनीत कॅश एक्झिक्युटिव्ह म्हणून कार्यरत आहेत. त्यांनी अंबरनाथ आणि बदलापूर परिसरातील सहा ठिकाणांहून एकूण नऊ लाख ६२ हजार ७२० रुपये रोख रक्कम जमा केली होती. ही रक्कम बॅगेत ठेवून ते त्यांच्या दुचाकीवरून कल्याणकडे जात असताना चिखलोली येथे सकाळी ११:२८ ते ११:३३ वाजताच्या दरम्यान ही घटना घडली. एका दुचाकीवर आलेल्या दोन अनोळखी व्यक्तींनी दुचाकी सुरोशी यांच्या दुचाकीसमोर आडवी थांबवली. तसेच पाठीमागे बसलेल्या अंदाजे २५ ते ३० वयोगटातील एका आरोपीने खाली उतरून ‘तुम्ही त्यांना ठोकर मारली आहे,’ असा खोटा आरोप केला. त्याने सुरोशी यांना शिवीगाळ करीत त्यांच्या दुचाकीची चावी काढून घेतली. त्याच वेळी अंदाजे ३० ते ३५ वयोगटातील त्यांचा तिसरा साथीदार मागून धावत आला. त्याने सुरोशी यांना ठोशाबुक्क्यांनी मारहाण करून खाली पाडले आणि त्यांच्याकडील रोख रकमेची बॅग हिसकावून घेतली. यानंतर तिन्ही आरोपी मोटारसायकलवरून पसार झाले. या हल्ल्यात फिर्यादी कैलास सुरोशी यांच्या हनुवटीला दुखापत झाली आहे.

गुन्हा दाखल
या घटनेप्रकरणी अंबरनाथ पश्चिम पोलिस ठाण्यात तीन अनोळखी आरोपींविरोधात भारतीय न्यायसंहिता कलम ३०९ (६) आणि ३ (५) प्रमाणे गुन्हा दाखल करण्यात आला आहे. सहाय्यक पोलिस निरीक्षक सुभाष पानसरे हे या प्रकरणाचा पुढील तपास करीत आहेत.