कलाकारांच्या मैफलीत रंगली कोजागिरीची रात्र

भिवंडी, ता. १० (बातमीदार) : शहरातील ब्राह्मण आळीतील एन.ई.एस. इंग्लिश माध्यमिक शाळेच्या दांडेकर सभागृहात सोमवारी (ता. ६) टिळक चौक मित्रमंडळाने कोजागिरी पौर्णिमा निमित्ताने सांस्कृतिक महोत्सव भरवला होता. या कार्यक्रमात परिसरातील कलाकारांनी आणि गायकांनी कला सादर करून कोजागिरीच्या रात्रीची मैफल रंगविली.
कार्यक्रमाची सुरुवात सरस्वती पूजन आणि दीप प्रज्वलन करून करण्यात आली. प्रास्ताविक मिलिंद पळसुळे यांनी केले. तर स्वर सरगम म्युझिक हब करावके ग्रुपमधील भावना पोतदार, भक्ती मदन, प्रमोद जाधव, संजय मौर्य आणि किशन स्वामी यांनी देवभक्ती, देशभक्ति आणि विविध गाण्यांनी उपस्थित मान्यवरांची आठवण जागवली. कार्यक्रमात सुगंध टावरे यांची मंडळाच्या कार्याध्यक्षपदी नियुक्ती झाल्याने त्यांचा सत्कार करण्यात आला. कार्यक्रमासाठी मंडळातील अध्यक्ष सदानंद पिंपळे, उपाध्यक्ष रोमा आळशी, सचिव सुदाम भोजने, खजिनदार सुधीर डोंगरे यांच्यासह दिलीप चौघुले, दीपक वाघ आणि सर्व सदस्यांनी मेहनत घेतली.