खड्डेमय राज्य महामार्गामुळे एकाच कुटुंबातील चार जखमी

कासा, ता. ७ (बातमीदार) : डहाणू-कासा-जव्हार हा राज्य महामार्ग सध्या अक्षरशः खड्डेमय बनला आहे. या रस्त्यावरील दयनीय स्थितीमुळे अपघातांचे प्रमाण दिवसेंदिवस वाढत आहे. चारोटी आणि कासादरम्यान असलेल्या मोठ्या खड्ड्यांमध्ये दुचाकी आदळून मंगळवारी (ता. ७) दुपारी झालेल्या अपघातात एकाच कुटुंबातील चार जण जखमी झाले. विशेष म्हणजे, यामध्ये दोन चिमुकलींचा समावेश आहे. सुदैवाने या मार्गावर वर्दळ कमी असल्याने मोठा अनर्थ टळला.

गेल्या अनेक महिन्यांपासून डहाणू-कासा-जव्हार महामार्गावर अनेक ठिकाणी मोठे खड्डे पडले आहेत. सार्वजनिक बांधकाम विभाग आणि कंत्राटदारांकडून वेळोवेळी खड्डे बुजवण्याचे काम झाले असले तरी मुसळधार पावसामुळे रस्त्यांची पुन्हा दुरवस्था झाली आहे. या मार्गावर योग्य पावसाच्या निचऱ्याची सोय नसल्यामुळे पाणी रस्त्यावर साचते. त्यामुळे खड्ड्यांचे प्रमाण आणखीन वाढले आहे. परिणामी, वाहनचालक, विद्यार्थी, महिला आणि रुग्णांना प्रवास करताना मोठा त्रास सहन करावा लागत आहे.

नागरिकांकडून संताप
स्थानिक नागरिकांचा रोष दिवसेंदिवस वाढत असून, प्रशासनाच्या निष्क्रियतेबद्दल संताप व्यक्त केला जात आहे. यासंदर्भात स्थानिक ग्रामपंचायतीचे उपसरपंच हरेश मुकणे यांनी सांगितले की, गेल्या अनेक महिन्यांपासून रस्त्यांची अवस्था अतिशय वाईट झाली आहे. या मार्गावरून शाळकरी मुले, महिला आणि रुग्णांना रोज प्रवास करावा लागतो. त्यामुळे सार्वजनिक बांधकाम विभागाने तत्काळ उपाययोजना करून दुरुस्ती करावी. याबाबत सार्वजनिक बांधकाम विभागाशी संपर्क करण्याचा प्रयत्न केला गेला असता प्रतिसाद मिळाला नाही.