बंदीच्या नातेवाईकांना मिळणार शुद्ध पिण्याचे पाणी

बंदीच्या नातेवाईकांना मिळणार शुद्ध पिण्याचे पाणी
ठाणे शहर, ता. ७ (बातमीदार) ः ठाणे मध्यवर्ती कारागृहातील बंद्यांच्या नातेवाईकांकरिता वॉटर कुलर बसवण्यात आला आहे. बंद्यांना भेटण्यासाठी येणाऱ्या नातेवाईकांच्या पिण्याच्या पाण्याची चांगली सुविधा नव्हती, मात्र आता या सुविधेमुळे येथे येणाऱ्यांना आता पिण्यासाठी शुद्ध पाणी उपलब्ध होणार आहे. अतिरिक्त कारागृह अधीक्षक राजाराम भोसले यांच्या हस्ते याचे उदघाटन झाले. ठाणे मध्यवर्ती कारागृहामध्ये तीन हजारांहुन अधिक बंदी बंदिस्त आहेत. त्यांना रोज भेटण्याकरता येणाऱ्या नातेवाईकांची संख्या देखील मोठी आहे. भेटायला येणाऱ्यांमध्ये महिला वृद्ध आणि लहान मुलांचाही समावेश असतो, मात्र असे असताना प्रतीक्षालयात त्यांच्याकरिता पिण्याच्या पाण्याची चांगली सुविधा नव्हती. येथे बसवण्यात आलेल्या टाकीमधून त्यांना पाणी प्यावे लागत होते. मात्र आता त्यांची ही समस्या दूर झाली आहे. येथील प्रतिक्षालयात इनरव्हील क्लब ऑफ ठाणे वेस्ट यांच्या सौजन्याने आर.ओ. वॉटर कुलर बसवण्यात आले आहे. त्याचे उद्घाटन मंगळवारी (ता.७) करण्यात आले. याप्रसंगी इनरव्हील चेअरमन लक्ष्मी सिंग, माजी डिस्ट्रिक्ट गव्हर्नर कुमार केवलरमाणी, रोटरी क्लब ऑफ ठाणे वेस्टचे अध्यक्ष संतोष कदम, तसेच इनरव्हील क्लब ऑफ ठाणे वेस्टच्या अध्यक्षा सुखी कोपरकर आणि कारागृहाच्या वतीने अतिरिक्त अधीक्षक राजाराम भोसले, उप अधीक्षक विलास कापडे, वरिष्ठ तुरुंगाधिकारी कैलास भवर, उपस्थित होते. अशी माहिती कारागृह अधीक्षक राणी भोसले यांनी दिली आहे.