मद्यप्राशन करून वाहन चालविणाऱ्यास शिक्षा

मद्यप्राशन करून वाहन चालविणाऱ्यास शिक्षा
सकाळ वृत्तसेवा
ठाणे, ता. ८ : मद्यप्राशन करून नशेत वाहन चालवल्याप्रकरणी नवी मुंबईतील एका २४ वर्षीय तरुणास ठाणे प्रथम वर्ग (७ वे न्यायालय) न्यायदंडाधिकाऱ्यांनी मंगळवारी (ता. ७) १५ हजार रुपये दंडाची शिक्षा ठोठावला. दंड न भरल्यास ३० दिवसांच्या साध्या कैदेची शिक्षा भोगावी लागणार आहे. अशाप्रकारे शिक्षा होण्याची ठाणे शहर पोलिस आयुक्तालयातील ही पहिलीच वेळ असल्याची माहिती ठाणे शहर वाहतूक पोलिसांनी दिली. नौपाडा वाहतूक उपविभागाच्या वरिष्ठ पोलिस निरीक्षक गौरी मोरे यांच्या पथकाने तीन पेट्रोलपंप येथे मद्यप्राशन करून वाहन चालविणाऱ्यांविरोधात शुक्रवारी (ता. ३) नियमित तपासणी सुरू होती. त्या वेळी वाहतूक पोलिसांनी मद्यप्राशन करून वाहन चालविणाऱ्या त्या तरुणाला पकडले. त्याच्याकडे वाहन परवानाही नव्हता. याबाबत त्याच्याविरोधात मोटार वाहन कायदा कलम १८५ अन्वये तक्रार नोंदविण्यात आली. मंगळवारी (ता. ७) त्याला ठाणे प्रथम वर्ग न्यायदंडाधिकाऱ्यांच्या न्यायालयात हजर केले असता, न्यायालयाने मोटार वाहन कायदा कलम १८५, ३(१) आणि १८१ नुसार १५ हजार रुपयांचा दंड ठोठावला. तो दंड न भरल्यास त्याला ३० दिवसांची साधी कैद अशी शिक्षा भोगावी लागणार आहे. या तरुणाने दंड न भरल्याने त्या तरुणाची ठाणे जिल्हा मध्यवर्ती कारागृहात रवानगी करण्यात आली आहे. अशाप्रकारे शिक्षा होण्याची ही पहिलीच वेळ असल्याची माहिती ठाणे शहर वाहतूक शाखेचे पोलिस उपायुक्त पंकज शिरसाट यांनी दिली.