१५ दिवसात निवृत्तधारकांच्या मागण्या निकाली काढा

१५ दिवसांत निवृत्तिधारकांच्या मागण्या निकाली काढा
मुख्य कार्यकारी अधिकारी यांचे निर्देश
सकाळ वृत्तसेवा
ठाणे, ता. ९ : जिल्हा परिषदेतील निवृत्तिवेतनधारकांच्या अनेक वर्षांपासून प्रलंबित मागण्या त्वरित निकाली काढाव्यात, असे आदेश माजी मुख्य कार्यकारी अधिकारी रोहन घुगे यांनी दिले. पेन्शनर वेल्फेअर असोसिएशनच्या पदाधिकाऱ्यांनी त्यांच्या मागण्यांचा मुद्दा मांडल्यानंतर खातेप्रमुखांना १५ दिवसांत कार्यवाही करण्याचे निर्देश देण्यात आले.
मागील अनेक वर्षांपासून निवृत्तिवेतनधारकांच्या मागण्या प्रलंबित आहेत. या मागण्यांचा पेन्शनर वेल्फेअर असोसिएशनचे पदाधिकारी यांनी तत्कालीन मुख्य कार्यकारी अधिकारी रोहन घुगे यांच्या समोर पाढा वाचला. या वेळी घुगे यांनी चर्चा करून प्रलंबित मागण्या निकाली काढण्याचे निर्देश सर्व खातेप्रमुखांना आदेश दिले. सर्वोच्च न्यायालयाच्या आदेशानुसार, निवृत्त कर्मचाऱ्यांकडून अतिप्रदान रकमेची वसुली टाळावी. सेवानिवृत्तीच्या उंबरठ्यावर असलेल्या आणि पाच वर्षांपूर्वी अतिप्रदान झालेल्या रकमा परत वसूल करू नयेत व केल्यास ती रक्कम परत करावी, असे घुगे यांनी स्पष्ट केले.
ग्रामविकास विभागाच्या आणि विभागीय आयुक्तांच्या सूचनांनुसार रोखलेले लाभ आणि दोन टंकलेखनाशी संबंधित प्रस्ताव तत्काळ सादर करण्याच्या सूचनाही उपमुख्य कार्यकारी अधिकारी अविनाश फडतरे यांना देण्यात आल्या. लेखा संवर्गातील समायोजन पूर्ण होईपर्यंत लिपिक संवर्गातील काम केलेल्यांना १२/२४ वर्षांचे लाभ कायम ठेवण्याचे निर्देश देण्यात आले. इतर सर्व मागण्यांचे प्रस्ताव मंजुरीसाठी सादर करून १५ दिवसांत निर्णय घेण्याचे आदेश सर्व विभागांना दिले असल्याची माहिती पेन्शनर वेल्फेअर असोसिएशनचे सचिव रामचंद्र मडके यांनी दिली आहे.