सराफा दुकानातील कामगाराच्या हत्तेतील तिसऱ्या आरोपीला अटक

सराफा दुकानाच्या कामगाराच्या हत्येतील तिसरा आरोपी अटकेत
शहापूर, ता. ९ (वार्ताहर) ः गोठेघर येथील महालक्ष्मी ज्वेलर्सच्या कामगाराच्या हत्येतील तिसऱ्या आरोपीला तब्बल दहा महिन्यांनंतर गुरुवारी (ता. ९) अटक करण्यात आली. २१ डिसेंबर २०२४ रोजी झालेल्या या गुन्ह्यात, कामगार दिनेश चौधरी हे दुकान बंद करून घरी जात असताना अज्ञात हल्लेखोरांनी गोळ्या झाडून त्यांची हत्या केली आणि त्यांच्याजवळची बॅग घेऊन ते पळून गेले होते.
यापूर्वीच, पोलिसांनी सशांक ऊर्फ सोनू मिश्रा याला उत्तर प्रदेशमधून आणि तौसिफ आलम सिद्दीकी याला भिवंडीतून अटक केली होती. आता या कटातील तिसरा आरोपी फैजान सिद्धीकी यालाही उत्तर प्रदेशातून अटक करण्यात आली आहे. अद्यापही या गुन्ह्यातील तीन आरोपी फरार असून, पोलिस त्यांचा कसून शोध घेत आहेत, अशी माहिती पोलिस उपअधीक्षक मिलिंद शिंदे यांनी दिली.