डॉ. श्रीपाद जोशी यांचा उद्या अमृतमहोत्सवी सत्कार सोहळा

डॉ. श्रीपाद जोशी यांचा उद्या अमृतमहोत्सवी सत्कार सोहळा

मुंबई, ता. ९ ः ज्येष्ठ कवी, साहित्यिक आणि संपादक डॉ. श्रीपाद भालचंद्र जोशी यांचा अमृतमहोत्सवी सत्कार सोहळा शनिवारी (ता. ११) नागपूरमध्ये आयोजित करण्यात येणार आहे. व्हीआयपी रोडवरील वनामतीच्या वसंतराव नाईक स्मृती सभागृहात सायंकाळी ५.४५ वाजता होणाऱ्या सोहळ्यात साहित्य क्षेत्रांतील विविध मान्यवर उपस्थित राहणार आहेत. डॉ. जोशी यांची मुलाखत होणार असून त्यांची ग्रंथतुलाही केली जाणार आहे.
माजी कुलगुरू डॉ. शरद निंबाळकर यांच्या अध्यक्षतेखाली आणि डॉ. गिरीश गांधी सहअध्यक्ष असलेल्या डॉ. श्रीपाद भालचंद्र जोशी अमृतमहोत्सवी सत्कार समितीतर्फे सोहळा होणार आहे. सोहळ्यात केंद्रीय मंत्री नितीन गडकरी यांचे दृकश्राव्य संदेशाद्वारे मनोगत व्यक्त होईल. सोहळ्याला प्रमुख अतिथी म्हणून मराठी भाषामंत्री उदय सामंत, माजी मंत्री डॉ. नितीन राऊत व ज्येष्ठ पत्रकार आणि माजी राज्यसभा खासदार कुमार केतकर उपस्थित राहणार आहेत. विशेष अतिथी म्हणून ज्येष्ठ विचारवंत डॉ. रावसाहेब कसबे, ज्येष्ठ समाजवादी नेते रघू ठाकूर, अ. भा. मराठी साहित्य संमेलनाचे पूर्वाध्यक्ष प्रा. वसंत आबाजी डहाके, डॉ. श्रीपाल सबनीस आणि उत्तम कांबळे, ज्येष्ठ लेखक व समीक्षक डॉ. वि‌. स. जोग, वैद्यकीय शिक्षणतज्ज्ञ डॉ. वेदप्रकाश मिश्रा आणि अ. भा. मराठी साहित्य महामंडळाचे अध्यक्ष प्रा. मिलिंद जोशी उपस्थित असतील.
मुख्य सत्कार सोहळ्याच्या आधी दुपारी चार वाजता, प्रमोद भुसारी यांची संकल्पना व दिग्दर्शन असलेली डॉ. श्रीपाद जोशी यांची प्रकट मुलाखत नाट्यमय अभिरूप न्यायालय स्वरूपात आयोजित करण्यात आली आहे. सायंकाळी पाच वाजता महाराष्ट्र राज्य ग्रंथालय संघाच्या सहकार्याने डॉ. जोशी यांची ग्रंथतुला केली जाईल. दुपारी ३.४५ वाजता छायाचित्र प्रदर्शनाचे उद्‍घाटन होईल. दुपारी २ ते ३.४५ दरम्यान अनौपचारिक साहित्यिक गप्पा-टप्पा व कविकट्टाही होणार आहे.