बालमृत्यू प्रकरणानंतर नालासोपाऱ्यात ५ औषधी दुकानांना सील

नालासोपाऱ्यात पाच औषध दुकानांना टाळे
नालासोपारा, ता. १० (बातमीदार) : मध्य प्रदेशातील भेसळयुक्त कफ सिरपमुळे झालेल्या बालमृत्यूच्या गंभीर घटनेनंतर अन्न आणि औषध प्रशासनाने (एफडीए) राज्यभर तपासणी मोहीम सुरू केली आहे. या मोहिमेअंतर्गत, पालघर जिल्हा पथकाने गुरुवारी (ता. ९) नालासोपारा आणि विरारमधील पाच औषध दुकानांना टाळे ठोकले आहे. बोगस औषधांचा साठा करून नागरिकांच्या जीवाशी खेळणाऱ्या दुकानदारांवर ही कारवाई करण्यात आली आहे.
गजानन माँ मेडिकल (नालासोपारा पूर्व, गोराइनाका बिलालपाडा), मुलजी मेडिकल (वलईपाडा, संतोषभुवन), सोसायटी केमिस्ट मेडिकल अँड जनरल स्टोअर (रुद्र नगर, तुळिंज), राजाराम मेडिकल (नगीनदास पाडा, नालासोपारा पूर्व) आणि रॉयल केमिस्ट (विरार पश्चिम) अशी या दुकानांची नावे आहेत. याशिवाय, काही औषध विक्रेत्यांना त्यांचे परवाने निलंबित किंवा रद्द का करू नयेत, यासाठी कारणे दाखवा नोटीस बजावण्यात आल्याची माहिती प्रशासनाने दिली आहे.