स्वयंरोजगारासाठी अल्पमुदतीचे अभ्यासक्रम सुरू

भिवंडी, ता. १३ (वार्ताहर) : शहरातील भादवड येथील शासकीय संत कबीर औद्योगिक प्रशिक्षण संस्थेत स्वयंरोजगाराला पूरक अशा अल्पमुदतीच्या विविध नावीन्यपूर्ण अभ्यासक्रमांना सुरुवात करण्यात आली. देशभरात पंतप्रधान नरेंद्र मोदी यांच्या हस्ते दृकश्राव्य माध्यमातून या प्रकल्पाचे उद्‍घाटन करण्यात आले, ज्याचे थेट प्रसारण संस्थेत करण्यात आले.
संस्थेच्या प्राचार्य सीमा महाजन यांच्या अध्यक्षतेखाली पार पडलेल्या या कार्यक्रमाला माजी आमदार रूपेश म्हात्रे, पद्मश्री अण्णासाहेब जाधव शाळेचे मुख्याध्यापक सुधीर घागस, महापालिकेच्या अधिकारी व अल्पसंख्याक समाजाच्या प्रतिनिधी सायराबानो अन्सारी, भिवंडी भाजप उपाध्यक्ष श्रीनिवास भैरी, तसेच पालिका क्रीडा विभाग प्रमुख मिलिंद पळसुले आदी मान्यवर उपस्थित होते. केंद्राचे उद्‍घाटन अल्पसंख्याक समाजाच्या प्रतिनिधी म्हणून सायराबानो अन्सारी यांच्या हस्ते झाले. उपक्रमाद्वारे तरुणांना स्वावलंबी बनवण्याची दिशा मिळेल. अधिकाधिक विद्यार्थ्यांनी या संधीचा लाभ घ्यावा, असे आवाहन त्यांनी केले.
अल्पमुदतीचे प्रशिक्षण पूर्ण करणाऱ्या विद्यार्थ्यांना स्वयंरोजगाराच्या संधी मिळतील आणि ते रोजगारनिर्मितीच्या दिशेने वाटचाल करतील, असे माजी आमदार रूपेश म्हात्रे यांनी सांगितले. कार्यक्रमाचे प्रास्ताविक भरत साबळे यांनी केले, तर सूत्रसंचालन अनिल कदम यांनी केले. कार्यक्रमासाठी प्रथम चौधरी, ज्योत्स्ना सोनटक्के आणि विकास पारखी यांनी विशेष परिश्रम घेतले.

हे प्रशिक्षण मिळणार
प्रशिक्षणांतर्गत टेलरिंग, मेटल ए.आर.सी. वेल्डिंग, फिटर मॅकेनिक, फ्रीज आणि ए.सी. रिपेरिंग, वॉशिंग मशीन दुरुस्ती, इलेक्ट्रिशियन, फिटर आदी स्वयंरोजगाराला प्रोत्साहन देणारे अभ्यासक्रम सुरू करण्यात आले आहेत. या सर्व अभ्यासक्रमांसाठी दहावी उत्तीर्ण ही शैक्षणिक पात्रता असून प्रशिक्षणाचा कालावधी दोन महिने असणार आहे.