गोवंडी, शिवाजीनगर भागात बेकायदेशीर पार्किंग

गोवंडी, शिवाजीनगर भागात बेकायदेशीर पार्किंग
उपायजोजना करण्याची स्थानिकांची मागणी
सकाळ वृत्तसेवा
मुंबई, ता. १३ ः गोवंडी, शिवाजीनगर आणि बैंगणवाडी या भागात बेकायदेशीर वाहन पार्किंग आणि वाहतुकीच्या नियमांचे उल्लंघन होत असून, या भागात सीसीटीव्ही लावण्यात यावेत, अशी स्थानिकांची मागणी आहे, मात्र पालिका आणि पोलिस प्रशासनाचे या समस्येकडे दुर्लक्ष होत असल्याने अपघातांचे प्रमाण वाढत आहे.
गोवंडीतील अपघातात चार जणांचा डम्परखाली चिरडल्याने मृत्यू झाला होता, मात्र अजूनही या भागात परिस्थितीत सुधारणा झालेली नाही. पालिका अधिकाऱ्यांची भेट घेऊन शिवाजीनगर व बैंगणवाडी चौकातील बेकायदेशीर पार्किंग हटवून तातडीने सीसीटीव्ही कॅमेरे, गतीरोधक लावण्यात यावेत, अशी मागणी स्थानिकांनी केली होती. त्यानुसार पालिका व वाहतूक विभागाचे अधिकारी पाहणी करून गेले. कार्यवाही करण्याचे आश्वासन दिले, मात्र अजूनही या भागात काही सुधारणा झाली नसल्याचे स्थानिकांचे म्हणणे आहे.
बेकायदेशीर पार्किंग, पदपथावर फेरीवाल्यांचे अतिक्रमण, आधुनिक सिग्नल व्यवस्था नसल्याने वाहतूक कोंडीचा सामना करावा लागतो. या भागात सीसीटीव्ही कॅमेरे, सूचनाफलक, नियमांचे चिन्ह व गतिरोधक नसल्याने या परिसरात सतत अपघातांचे प्रमाण वाढत असल्याच्या स्थानिकांच्या तक्रारी आहे. या भागातील समस्या लक्षात घेऊन खासदार संजय दिना पाटील यांनीही पालिका आणि वाहतूक पोलिस यांची बैठक बोलावली होती. त्याबाबत त्यांनी पत्रव्यवहारही केला होता.

अत्यंत दाटीवाटीच्या या भागाच वाहतुकीची समस्या गंभीर आहे. बेकायदेशीर पार्किंग आणि अपघातांचे प्रमाण वाढले आहे. शिवाजी नगर येथे भरधाव येणाऱ्या डम्‍परने दुचाकीस्वाराला धडक दिल्याने चार जणांचा मृत्यू झाला होता. सामान्यांचे जीव जात आहेत. पालिका आणि वाहतूक पोलिसांनी याबाबत तातडीने उपाययोजना कराव्यात.
- संजय दिना पाटील, खासदार