कल्याण वाहतूक विभागाचा पोलिसांनाही शिस्तीचा धडा

कल्याण वाहतूक विभागाचा पोलिसांनाही शिस्तीचा धडा
कल्याण, ता. ११ (बातमीदार) : रेल्वे स्थानक परिसरात वाहतूक कोंडीची समस्या तीव्र बनत आहे. अशात, स्थानकाजवळ नो पार्किंग झोनमधील नागरिकांच्या वाहनांसह पोलिसांच्या दुचाकी वाहनांवरही दंडात्मक कारवाई करण्यात आली आहे. वाहतूक कर्मचाऱ्यांनी सर्वांसाठी शिस्त महत्त्वाची असल्याचा संदेश दिला आहे.
स्थानक परिसरात नो पार्किंगमध्ये बेशिस्तपणे पोलिसांच्या दुचाकी उभ्या राहण्याचा प्रकार मोठ्या प्रमाणावर पाहायला मिळाला होता. यामुळे वाहतूक कोंडीत भर पडत होती. अशात वाहतूक पोलिसांनी या पोलिसांच्या दुचाकीवर दंडात्मक कारवाई केली आहे. यामुळे स्थानक परिसरातील वाहतूक सुरळीत होण्याची आशा व्यक्त केली जात आहे. कल्याण वाहतूक विभागाच्या या उपक्रमाला समाज माध्यमांवरही मोठा प्रतिसाद मिळाला असून, शिस्त सर्वांसाठी, मग तो पोलिस असो वा नागरिक या तत्वाचे पालन करण्याचा संदेश दिला गेला आहे.