तासिका शिक्षकांच्या पुनर्नियुक्तीची मागणी

तासिका शिक्षकांच्या पुनर्नियुक्तीची मागणी
नेरूळ, ता. १२ (बातमीदार) : महापालिका शाळांमध्ये कार्यरत घड्याळी तासिका तत्वावरील माध्यमिक व प्राथमिक शिक्षकांच्या पुनर्नियुक्तीचे आदेश तातडीने द्यावे, अशी मागणी महाराष्ट्र कर्मचारी युनियनचे अध्यक्ष रवींद्र सावंत यांनी महापालिका आयुक्त डॉ. कैलास शिंदे यांच्याकडे लेखी निवेदनाद्वारे केली आहे.
पालिकेच्या माध्यमिक शाळांमध्ये २०२३ रोजी शिक्षकांची कमतरता भासल्यामुळे तत्कालीन महापालिका आयुक्तांनी नवीन भरती जाहिरात देऊन घड्याळी तासिका शिक्षकांची नियुक्ती केली होती. त्यानंतर शैक्षणिक वर्ष २०२४–२५ साठी पुनर्नियुक्ती देण्यात आली, तर २०२५ साठी १ जुलै ते १७ ऑक्टोबर या कालावधीत तासिका शिक्षकांची नियुक्ती झाली होती. हा कालावधी आता संपत आला आहे. या शिक्षकांनी सलग दोन वर्ष महापालिका शाळांमध्ये सेवा बजावली असून, वाढत्या महागाईत कमी वेतनावर त्यांनी प्रामाणिकपणे काम केले आहे. त्यांनी शासकीय सुट्ट्या, साप्ताहिक सुट्ट्या, गणपती, दिवाळी व उन्हाळी सुट्ट्यांमध्ये विनावेतन कार्य केले आहे. परंतु महापालिकेने दिवाळीसाठी सानुग्रह अनुदानही दिलेले नसल्याचे युनियनयचे म्‍हणणे आहे. सद्यस्थितीत पालिकेच्या शाळांमध्ये शिक्षकांची कमतरता आहे. विद्यार्थ्यांना शिक्षणात अडचण येऊ नये, तसेच गुणवत्ताधारक शिक्षकांना बेरोजगारीच्या संकटातून वाचवण्यासाठी तातडीने पुनर्नियुक्ती देणे अत्यावश्यक आहे. हे शिक्षक गावांपासून शहरात आलेले असून भाड्याच्या घरात राहतात, त्यामुळे त्यांच्या हिताचे संरक्षण करणे महापालिकेच्या जबाबदारीत येते. त्‍यामुळे महाराष्ट्र कर्मचारी युनियनच्या वतीने घड्याळी तासिका तत्वावरील माध्यमिक व प्राथमिक शिक्षकांना मानवतावादी दृष्टिकोन ठेवून त्वरित पुनर्नियुक्तीचे आदेश देण्याची विनंती महापालिकेला करण्यात आली आहे.