धोकादायक पूलांच्या पूनर्बांधणीचे आव्हान

धोकादायक पुलांच्या पुनर्बांधणीचे आव्हान
दुरुस्‍तीचे काम संथ गतीने; उपाययोजना करण्याची गरज
सकाळ वृत्तसेवा
मुंबई, ता. १३ ः मुंबईतील २१ पुलांच्या पुनर्बांधणीचा निर्णय छत्रपती शिवाजी टर्मिनस येथील हिमालय पूल पडल्यानंतर घेण्यात आला होता, मात्र पुलांच्या पुनर्बांधणीचे आणि दुरुस्तीचे पालिकेपुढे आव्हान निर्माण झाले आहे. पुलांची कामे संथ गतीने सुरू आहेत. ४७ पुलांची मोठी दुरुस्ती आणि १४४ पुलांची किरकोळ दुरुस्ती करण्यात दिरंगाई होत असल्याने धोकादायक पुलांबाबत नागरिकांना चिंता वाटत आहे.
गणेशोत्सव काळात १३ धोकादायक पुलांवरून मूर्तींचे आगमन आणि विसर्जन मिरवणुका नेण्यास बंदी घातली होती. मुंबईतील ब्रिटिशकालीन असलेल्या ३४४ पुलांचा धोका टाळण्यासाठी या पुलांचे नियमित ऑडिट करण्याचा आणि त्यासाठी सल्लागार नेण्याचा निर्णय पालिका प्रशासनाने हिमालय पूल दुर्घटनेनंतर घेतला होता. त्यांच्या सल्ल्यानुसार पुलाची डागडुजी अथवा पूल पाडून त्याचे नव्याने बांधकाम केले जाणार असल्याचे ठरले होते. २०१९ पूर्वी मुंबईतील सर्व पुलांचे ऑडिट करण्यात आले. त्यानुसार हिमालय पुराच्या दुरुस्तीबाबतही शिफारस केली होती. त्याकडे दुर्लक्ष झाल्यामुळे दुर्घटना घडली होती. त्‍यामुळे अशा दुर्घटना घडण्यासाठी उपाययोजना करण्याची आवश्‍यकता आहे.

धोकादायक पूल
मध्य रेल्वे -
घाटकोपर रेल्वे ओव्हर ब्रिज, करी रोड रेल्वे ओव्हर ब्रिज, आर्थर रोड रेल्वे ओव्हर ब्रिज किंवा चिंचपोकळी रेल्वे ओव्हर ब्रिज, भायखळा रेल्वे ओव्हर ब्रिज, शीव (सायन) स्थानक रेल्वे ओव्हर ब्रिज

पश्चिम रेल्वे
मार्गावरील मरीन लाइन्स रेल्वे ओव्हर ब्रिज, सँडहर्स्ट रोड रेल्वे ओव्हर ब्रिज (ग्रॅण्ट रोड व चर्नी रोडच्या मध्ये), फ्रेंच रेल्वे ओव्हर ब्रिज (ग्रॅण्ट रोड व चर्नी रोडच्या मध्ये), केनडी रेल्वे ओव्हर ब्रिज (ग्रॅण्ट रोड व चर्नी रोडच्या मध्ये), फॉकलॅन्ड रेल्वे ओव्हर ब्रिज (ग्रॅण्ट रोड व मुंबई सेंट्रलच्या मध्ये), महालक्ष्मी स्टेशन रेल्वे ओव्हर ब्रिज, प्रभादेवी–कॅरोल रेल्वे ओव्हर ब्रिज आणि दादर येथील लोकमान्य टिळक रेल्वे ओव्हर ब्रिज.