औद्योगिक क्षेत्रात पाणीपुरवठा करणारा टँकर ताब्यात

तारापूर, ता. १३ (बातमीदार) : पालघर जिल्हाधिकारी कार्यालयाने औद्योगिक क्षेत्रात पाणीपुरवठा करण्यासाठी टँकर मनाई केली आहे. या आदेशाचा भंग करून औद्योगिक क्षेत्रात बेकायदा पाणीपुरवठा करणारा टँकर पोलिसांनी ताब्यात घेतला आहे.

तारापूर औद्योगिक क्षेत्रामध्ये संचार करण्यास पाण्याच्या टँकर्सना पालघरचे जिल्हाधिकारी यांनी मनाई आदेश लागू केला आहे, मात्र या आदेशाचा भंग करून औद्योगिक क्षेत्रातील एका कारखान्याच्या आवारात बेकायदा पाणीपुरवठा करणारा टँकर आढळून आला. पोलिसांनी टँकर (क्र. एमएच ३८ एजी ७७९८) ताब्यात घेण्याची कारवाई केली. शनिवारी (ता. ११) मध्यरात्रीच्या सुमारास पोलिसांनी पाण्याचा टँकर ताब्यात घेऊन पोलिस ठाण्याच्या आवारात जमा केला आहे. याप्रकरणी पंचनामा करण्यात आला असून, पुढील कायदेशीर कार्यवाही सुरू आहे. यापूर्वी १३ सप्टेंबरला पाण्याची बेकायदा वाहतूक करणारा टँकर पोलिसांनी ताब्यात घेऊन संशयित आरोपींवर गुन्हा दाखल केला होता.