डोंबिवलीतील ज्येष्ठ रंगकर्मी सुधाकर इनामदार यांचे निधन

सुधाकर इनामदार यांचे वृद्धापकाळाने निधन
डोंबिवलीतील रंगकर्मी हरपला

सकाळ वृत्तसेवा
डोंबिवली, ता. १३ ः डोंबिवलीतील ज्येष्ठ रंगकर्मी सुधाकर श्रीनिवास इनामदार (वय ८९) यांचे रविवारी (ता. १२) वृद्धापकाळाने निधन झाले. त्यांच्या पश्चात पत्नी प्रमिला, दोन विवाहित मुले, मुलगी, जावई, सुना, नातवंड असा परिवार आहे. त्यांचा एक मुलगा मिलिंद इनामदार हे नाट्य क्षेत्रात कार्यरत असून, ते मुंबई विद्यापीठाच्या अकादमी ऑफ थिएटर्स येथे मार्गदर्शन करतात. सुधाकर यांनी नाट्य क्षेत्रात आणि रंगभूमीवर ५५ वर्षांहून अधिक काळ काम केले.
इनामदार हे मूळचे सातारा जिल्ह्यातील वरूड गावचे होते. नाट्यकलेचा प्रचार आणि प्रसार करण्यासाठी नाट्यदुदुंभी नावाची संस्था त्यांनी स्थापन केली. या संस्थेच्या माध्यमातून ६० वर्षे नाट्यविषयक विविध उपक्रम राबविले. हौशी, गुणवान कलाकार अशी त्यांची ओळख होती. सुश्री या नावाने ते ओळखले जात होते. या संस्थेच्या माध्यमातून त्यांनी १००हून अधिक नाटके-एकांकिकांमध्ये भूमिका साकारल्या. ६० हून अधिक नाटकांचे लेखन, निर्मिती आणि दिग्दर्शन केले. ‘यंदा कर्तव्य आहे’ या स्वलिखित विनोदी बहुपात्री नाटकाचे १०० हून अधिक प्रयोग सुश्रींनी केले. विविध वृत्तपत्रांमध्ये नाट्यविषयक ४००हून अधिक लेख लिहिले. अखिल भारतीय नाट्य परिषद, मराठी नाटककार संघ, डोंबिवली साहित्य सभा, नाट्यरसिक मंडळ, ज्येष्ठ नागरिक महासंघ, डोंबिवली गोग्रासवाडी, नाट्यकट्टा अशा संस्थांमध्ये त्यांचा नियमित वावर होता. त्यांना विविध पुरस्कारांनी गौरवण्यात आले होते.