तरुणाने घेतला खाडीत उडी

तरुणाने घेतला खाडीत उडी
चार तासांचा शोध अपयशी

सकाळ वृत्तसेवा
ठाणे, ता. १३ : कशेळी खाडीच्या उड्डाणपुलावर चारचाकी गाडी उभी करून कशेळी मैत्री पार्कमधील अनुराग केसरी (वय २८) या तरुणाने खाडीत उडी घेतल्याची घटना सोमवारी सकाळी १० वाजण्याच्या सुमारास घडली. त्याचा चार तास एका बोटीने शोध घेतला गेला; पण तो सापडला नाही.
पाण्याचा प्रवाह वाढत असल्याने शोधमोहीम नारपोली पोलिसांच्या आदेशानुसार तात्पुरत्या स्वरूपात थांबविण्यात आली, अशी माहिती ठाणे महापालिका आपत्ती व्यवस्थापन कक्षेने दिली. अनुराग हा चारचाकी गाडीने कशेळी येथून ठाण्याच्या दिशेने निघाला होता. त्याने अचानक खाडीच्या उड्डाणपुलावर येताच गाडी थांबवली. कोणालाही काही समजण्यापूर्वीच त्याने स्वतःला खाडीत झोकून दिले. यादरम्यान खाडीवर मोठ्या प्रमाणात वाहनांची गर्दी झाली होती. तसेच चालकाने आपला मोबाईल फोन गाडीत ठेवला होता. या घटनेची माहिती ठाणे महापालिका आपत्ती व्यवस्थापन कक्षेला मिळताच घटनास्थळी नारपोली पोलिस, प्रादेशिक आपत्ती व्यवस्थापन कक्षाचे कर्मचारी, ठाणे आणि भिवंडी अग्निशमन दलाचे जवान, ठाणे आपत्ती प्रतिसाद दलाचे जवान यांनी धाव घेतली. त्यांनी बोटीने सुमारे चार तास शोधमोहीम राबवली.