चोरीसाठी कुटुंबावर हल्ला करणारा अटकेत

बोळिंज (बातमीदार) : विरार पश्चिमेच्या अर्नाळा येथे राहणाऱ्या एका कुटुंबावर पहाटेच्या वेळी एका व्यक्तीने प्राणघातक हल्ला केला. या हल्ल्यात कुटुंबातील तीन सदस्य जखमी झाले होते. या प्रकरणी संशयित आरोपीला अटक करण्यात आली आहे. गुन्हे शाखा कक्ष ३ कडून ही कारवाई करण्यात आली आहे. बंदरपाडा या गावात राहणाऱ्या गोवारी कुटुंबावरील हल्ल्यात जगन्नाथ गोवारी (वय ७६), लीला गोवारी (७२) आणि नेत्रा गोवारी (५२) जखमी झाले होते. या प्रकरणी अर्नाळा सागरी पोलिस ठाण्यात गुन्हा नोंदविण्यात आला होता. याबाबत गुन्हे शाखा कक्ष ३ च्या पथकाकडून तपासाला सुरुवात करण्यात आली होती. याबाबत पोलिसांनी ५०० हून अधिक सीसीटीव्हीच्या आधारे शोध घेतला, तसेच तांत्रिक माहितीच्या आधारे संशयिताला मुंबई येथून अटक करण्यात आली आहे. दिपेश अशोक नाईक (वय २९) असे त्याचे नाव असून तो मुंबई येथे सुरक्षारक्षक म्हणून नोकरी करत होता. तो बंदरपाडा येथील रहिवासी असून कर्जबाजारी झाल्याने चोरीच्या उद्देशाने त्याने कुटुंबावर हल्ला केल्याचे तपासात समोर आले आहे.