जमावबंदीचे उल्लंघन भोवले

जमावबंदीचे उल्लंघन भोवले
रबाळे पोलिसांकडून १०० जणांवर गुन्हा
नवी मुंबई, ता.१५(वार्ताहर): ऐरोली-रबाळे परिसरातील विद्युत पुरवठा वारंवार खंडित होत असल्याने रबाळे पोलिस ठाण्यासमोर रास्ता-रोको करण्यात आला होता. या आंदोलनामुळे जमावबंदीच्या आदेशांचे उल्लंघन झाल्याने १०० जणांविरोधात गुन्हा दाखल करण्यात आला आहे.
ऐरोली, रबाळे परिसरातील विद्युत पुरवठा वारंवार खंडित होत होता. यामुळे ८० ते १०० नागरिकांनी ११ ऑक्टोबर रोजी रात्री १०.३० वाजता रबाळे पोलिस ठाण्यासमोर घोषणाबाजी केली होती. तर मध्यरात्री सव्वा एक वाजेपर्यंत पोलिस ठाण्यासमोर जमावाने ठाण मांडले होते. आंदोलनकर्त्यांची पोलिसांनी समजूत घातल्यानंतर आंदोलक निघून गेले होते. पण आंदोलनामुळे वाहतुकीस अडथळा निर्माण झाला होता. त्यामुळे नवी मुंबईच्या पोलिस उपायुक्तांनी (विशेष शाखा) महाराष्ट्र पोलिस अधिनियम १९५१ कलम ३७ (१) व (३) नुसार बजावलेल्या जमावबंदीच्या आदेशांचे उल्लंघन झाल्याने बी.एन.एस. कलम १८९(२), १८९(३), ४५, ४९, ५४, १२६(२), २२३ तसेच महाराष्ट्र पोलीस अधिनियम कलम ३७(१)(३), १३५ अंतर्गत गुन्हा दाखल केल्याची माहिती वरिष्ठ पोलिस निरीक्षक बाळकृष्ण सावंत यांनी दिली.