सोनसाखळी चोरटा जेरबंद

सोनसाखळी चोरटा जेरबंद
सकाळ वृत्तसेवा
ठाणे,ता.१५: धूम स्टाईलने दुचाकीवरून येत पायी चालणाऱ्या एका महिलेच्या गळ्यातील सोनसाखळी हिसकावून पोबारा करणाऱ्या शहापुरातील रुशांत बाळू चौधरी (३३) या चोरट्याला ठाणे ग्रामीण पोलिसांनी मोठ्या शिताफीने जेरबंद केले. तसेच चौकशीत आणखी दोन गुन्ह्यांची कबुली देत, त्या गुन्ह्यातील सोन्याचे दागिने आणि गुन्ह्यासाठी वापरलेली दुचाकी असा दोन लाख १९ हजारांचा मुद्देमाल हस्तगत करण्यात आला आहे.
भिवंडी, मालबिडी सुर्यानगर येथे राहणारे प्रल्हाद ठाकरे यांनी दिलेल्या तक्रारीत, त्यांची आई (ता.२) दुपारी १२ वाजण्याच्या सुमारास भिवंडी तालुक्यातील मौजे मानिवली फाटा येथून सुर्यानगर येथे पायी चालत जात होत्या. त्यावेळी समोरुन आलेल्या चोरट्याने त्यांच्या गळ्यातील ९.१५० ग्रॅम वजनाचे सोन्याचे मंगळसुत्र जबरीने खेचून पोबारा केला. चोरी गेलेले मंगळसूत्र ७० हजार रुपये असल्याने त्या तक्रारीत नमूद केले आहे. या गुन्हयाचा समांतर तपास करीत असताना स्थानिक गुन्हे शाखेच्या पथकाने शहापुरातील रुशांत चौधरी याला ताब्यात घेत, चौकशीत त्याने वाशिंद आणि शहापूर या दोन पोलिस ठाण्यातील गुन्हयांची कबुली दिली. त्याला गणेशपुरी पोलिसांच्या ताब्यात देण्यात आले असून पुढील तपास गणेशपुरी पोलिस ठाण्याचे पोलिस उपनिरीक्षक उमेश खिरड करत आहेत.