अल्पवयीन मुलीचे जबरदस्तीने लग्न; माता पिता, दोन दलाल महिलांसह सात जणांवर गुन्हा दाखल

अल्पवयीन मुलीचे जबरदस्तीने लग्न
माता-पिता, दोन दलाल महिलांसह सात जणांवर गुन्हा दाखल
वज्रेश्वरी, ता. १४ (बातमीदार) : पालघर जिल्ह्यातील वाडा तालुक्यातील एका १५ वर्षीय अल्पवयीन मुलीची लग्नासाठी देवाणघेवाण करून जबरदस्तीने बालविवाह लावून तिची विक्री केल्याची धक्कादायक घटना गणेशपुरी पोलिस ठाण्याच्या हद्दीतून समोर आली आहे. याप्रकरणी पीडित मुलीच्या तक्रारीवरून तिच्या माता-पिता, दोन दलाल महिला आणि वर पक्षाचे तीन लोक अशा सात जणांविरुद्ध गुन्हा दाखल करण्यात आला आहे. मुलीचे वडील सुदाम सखाराम मुकणे आणि सावत्र आई यांनी दोन नातेवाईक दलाल महिला (चित्रा नामदेव पवार व संगीता संजय भोईर) यांच्या मदतीने ६० ते ७० हजार रुपयांच्या मोबदल्यासाठी मुलीवर दबाव टाकून तिचा बालविवाह लावला.
मुलीचे लग्न फेब्रुवारी २०२५मध्ये सातारा येथील गणेश रामचंद्र कदम या तरुणाशी ठरवले गेले. पीडितेने विरोध करूनही तिचे न ऐकता २० एप्रिल २०२५ रोजी दिघाशी (ता. भिवंडी) येथे तिचे लग्न लावले गेले. लग्नानंतर दलाल महिलांनी वर पक्षाकडून ४० हजार रुपये घेतले. सासरच्या लोकांकडून होणाऱ्या सततच्या जाचाला कंटाळून मुलगी मामाकडे निघून गेली. या वेळी तिचा आई-वडील आणि दलालांनी व्यवहार करून बालविवाह लावल्याचे तिला समजले. ही बाब श्रमजीवी संघटनेच्या कार्यकर्त्यांच्या लक्षात येताच त्यांनी पीडितेला धीर देऊन गणेशपुरी पोलिस ठाण्यात गुन्हा दाखल केला.
आदिवासी क्षेत्र आढावा समितीचे अध्यक्ष विवेक पंडित यांनी घटनेची माहिती पोलिस अधीक्षक डी. एस. स्वामी यांना दिली. सध्या उपविभागीय अधिकारी राहुल झाल्टे यांच्या देखरेखीखाली गणेशपुरी पोलिस ठाण्याचे निरीक्षक कमलेश दिनकर बच्छाव पुढील तपास करीत आहेत.