विरार माजी आमदार क्षितिज ठाकूर यांच्या वर गुन्हा दाखल

माजी आमदार क्षितिज ठाकूर यांच्यावर गुन्हा दाखल
बोळिंज, ता. १४ (बातमीदार) : विरारचे माजी आमदार क्षितिज ठाकूर यांच्यासह १५० जणांवर गुन्हा दाखल करण्यात आला आहे. विरार पश्चिमेकडील ग्लोबल सिटीमध्ये ‘वचनपूर्ती जल उत्सव’ कार्यक्रमादरम्यान रस्ते अडवल्याच्या कारणावरून रविवारी (ता. १२) गोंधळ निर्माण झाला होता. या गोंधळानंतर बहुजन विकास आघाडीच्या कार्यकर्त्यांना बोळिंज पोलिस ठाण्यात बसवून ठेवण्यात आले होते. कार्यकर्त्यांना सोडवण्यासाठी आणि पोलिस ठाण्यातील वर्तणुकीबद्दल विचारणा करण्यासाठी माजी आमदार क्षितिज ठाकूर आणि त्यांचे पदाधिकारी पोलिस ठाण्यात गेले. या वेळी शिवसेना ठाकरे गटाचे नेते आणि पदाधिकारीदेखील उपस्थित होते. त्यांनी रात्री उशिरा ३ वाजेपर्यंत आंदोलन केले. या संपूर्ण घटनेनंतर जमावबंदीचे उल्लंघन आणि सरकारी कामात अडथळा आणल्याप्रकरणी माजी आमदार क्षितिज ठाकूर आणि अन्य १५० जणांविरुद्ध गुन्हा दाखल करण्यात आला आहे.