मिरा-भाईंदर महापालिका कर्मचाऱ्यांची दिवाळी आनंदाची

भाईंदर, ता. १५ (बातमीदार) : मिरा-भाईंदर महापालिकेच्या कर्मचाऱ्यांना दिवाळीनिमित्त सानुग्रह अनुदान जाहीर करण्यात आले आहे. हे सानुग्रह अनुदान गेल्यावर्षीप्रमाणेच असून, त्यात यावर्षी कोणतीही वाढ करण्यात आलेली नाही. महापालिकेच्या अर्थसंकल्पात सानुग्रह अनुदानासाठी यावर्षी सहा कोटींची तरतूद करण्यात आली आहे. त्यापैकी यावर्षी चार कोटी ८० लाख ९९ हजार रुपये खर्च होणार आहेत.

दिवाळी अवघ्या काही दिवसांवर येऊन ठेपली असताना प्रशासनाकडून सानुग्रह अनुदान जाहीर होत नसल्याने कर्मचाऱ्यांमध्ये अस्वस्थता निर्माण झाली होती, मात्र महापालिका आयुक्त राधाबिनोद शर्मा यांनी मंगळवारी (ता. १४) सानुग्रह अनुदान वाटपाच्या प्रस्तावावर स्वाक्षरी केली. त्यामुळे कर्मचाऱ्यांकडून आनंद व्यक्त करण्यात आला आहे. गतवर्षीप्रमाणेच यंदा सानुग्रह अनुदानाची रक्कम निश्चित करण्यात आली आहे. त्यानुसार वर्ग १ ते वर्ग ४ या श्रेणीतील १४१० कर्मचारी, तसेच महापालिका शाळांमधील शिक्षकांना प्रत्येकी २५ हजार ९५३ रुपयांची रक्कम मिळणार आहे. संगणक चालक व लघुलेखक यांना प्रत्येकी १९ हजार ९८४ रुपये, आरोग्य विभागातील ठोक मानधनावरील कर्मचाऱ्यांना १६ हजार ४१५ रुपये, बालवाडी शिक्षकांना ११ हजार ४२० रुपये सानुग्रह अनुदान देण्यात येणार आहे.