खार्डी दुहेरी हत्याकांडातील आरोपींना सबजेलमध्ये ‘व्हीआयपी ट्रीटमेंट’

खार्डी दुहेरी हत्याकांडातील आरोपींना व्हीआयपी ट्रीटमेंट?
तांगडी कुटुंबीयांचे उपकारागृहासमोर ठिय्या आंदोलन
भिवंडी, ता. १५ (वार्ताहर) : तालुक्यातील खारबाव रस्त्यावरील खार्डी येथे ११ ऑगस्ट रोजी झालेल्या भाजप युवा मोर्चा जिल्हा उपाध्यक्ष प्रफुल्ल तांगडी आणि तेजस तांगडी यांच्या दुहेरी हत्याकांडातील आरोपींना उपकारागृहात (सबजेल) व्हीआयपी ट्रीटमेंट मिळत असल्याचा गंभीर आरोप तांगडी कुटुंबीयांनी केला आहे.
मुख्य सूत्रधार विकी म्हात्रेसहित अटक केलेल्या सात आरोपींना न्यायालयीन कोठडीत असताना चौकशीसाठी भिवंडी तालुका पोलिस ठाण्याजवळच्या उपकारागृहात ठेवले आहे. तांगडी कुटुंबीयांच्या म्हणण्यानुसार, तिथे आरोपींना त्यांच्या कुटुंबीयांकडून बिर्याणी व इतर मेजवान्या दिल्या जात आहेत. याच्या निषेधार्थ तांगडी कुटुंबीयांनी उपकारागृहासमोर रात्रीच्या वेळी ठिय्या आंदोलन केले.
मृत प्रफुल्ल तांगडी यांच्या पत्नी सुशीला तांगडी यांनी आरोपींना विशेष सुविधा देणाऱ्या पोलिसांवर निलंबनाची कारवाई झाल्याशिवाय आंदोलन मागे घेणार नाही, अशी भूमिका घेतली होती. अखेरीस भिवंडी तालुका आणि गणेशपुरी पोलिसांनी घटनास्थळी धाव घेऊन दोषी पोलिसांवर कारवाईचे आश्वासन दिल्यानंतर तब्बल तीन तासांनी हे आंदोलन मागे घेण्यात आले. या घटनेमुळे उपकारागृह प्रशासन आणि पोलिस यंत्रणेवर प्रश्नचिन्ह निर्माण झाले आहे.

...अन्यथा आंदोलनाचा इशारा
मी माझ्या खासगी कामासाठी तहसीलदार कार्यालयात रात्री आलो होतो. आरोपीची आई आणि बहीण जेवणाचा डबा घेऊन आलेल्या दिसल्या. यावरून उपकारागृहामधील पोलिसांमार्फत आरोपींना घरचे जेवण दिले जात असल्याचे लक्षात आल्याने याची माहिती मी कुटुंबीयांना दिली. त्यानंतर सर्व भिवंडी तालुका पोलिस ठाण्यात दाखल झाले आणि याबाबत पोलिसांना जाब विचारला, असे मृत प्रफुल्ल तांगडी यांचा भाऊ उमेश तांगडी यांनी म्हटले. या प्रकरणात संबंधित पोलिसांवर निलंबनाची कारवाई झाली नाही तर मोठे आंदोलन करण्याचा इशाराही त्यांनी दिला. याबाबत पोलिस प्रशासनाची भूमिका समजू शकलेली नाही.