हक्क संरक्षण करण्यासाठी अक्षय कुमारही न्यायालयात

हक्क संरक्षण करण्यासाठी अक्षय कुमारही न्यायालयात

सकाळ वृत्तसेवा
मुंबई, ता.  १५ ः समाजमाध्यमांवरून विनापरवानगी फोटोंचा गैरवापर केल्याप्रकरणी अभिनेता अक्षय कुमारनेही अन्य सिनेतारकांप्रमाणे व्यक्तिमत्त्व हक्क संरक्षणासाठी उच्च न्यायालयात धाव घेतली आहे. न्यायालयाने त्याच्या याचिकेची दखल घेऊन बुधवारी (ता. १५) त्याला अंतरिम दिलासा देण्याचे स्पष्ट केले. 
एखाद्या व्यक्तीच्या परवनागीविना फोटोंचा वापर केल्यामुळे प्रतिष्ठेलाच धक्का पोहोचत नाही, तर त्यामुळे होणाऱ्या परिणामांनाही सामोरे जावे लागते, असेही न्या. आरिफ डॉक्टर यांच्या एकलपीठाने नमूद केले.  हे प्रकरण अक्षयच्या कुटुंबापुरते मर्यादित नाही, तर मोठ्या प्रमाणात जनतेशीही संबंधित आहे. अनेक वेळा एखाद्या बाबीबद्दल स्पष्टीकरण प्रसिद्ध करण्यापूर्वीच नुकसान होऊ शकते, असा दावा अक्षयकडून करण्यात आला. डीपफेक प्रतिमा आणि चित्रफिती, बनावट वस्तू, फसव्या जाहिराती, खोटे सदिच्छा दूत समर्थन आणि यूट्युब, फेसबुक, इन्स्टाग्राम, एक्स (पूर्वीचे ट्विटर) व विविध ई-वाणिज्य संकेतस्थळ या व्यासपीठांवर अक्षयच्या व्यक्तिरेखेचा मोठ्या प्रमाणात गैरवापर होत असल्याचा आरोप करून त्याने उच्च न्यायालयात धाव घेतली आहे. तसेच हे प्रकार रोखण्याबाबतचा अंतरिम आदेश देण्याची मागणी केली आहे.