एपीएमसी राष्ट्रीय बाजार घोषित, अधिसूचना जारी

एपीएमसीला राष्ट्रीय दर्जा
बाजार समिती कायद्यात सुधारणा होणार; अधिसूचना जारी
तुर्भे, ता. १६ (बातमीदार) : बाजार समिती कायद्यात सुधारणा करून राष्ट्रीय बाजाराची स्थापना करणारा अध्यादेश राज्यपाल आचार्य देवव्रत यांनी नुकताच जारी केला आहे. याची अधिसूचना शासकीय राजपत्रात प्रसिद्ध झाली असून, यामुळे मुंबई एपीएमसी बाजाराला राष्ट्रीय दर्जा मिळण्याचा मार्ग मोकळा झाला आहे. यामुळे बाजाराच्या प्रशासकीय आवारात उत्साहाचे वातावरण असले तरी बाजार घटकांना प्रत्यक्षात याचा कोणताच फायदा होणार नसल्याचा दावा बाजार समिती संचालकांनी केला आहे.
राज्यातील ५१ पैकी आठ महत्त्वाच्या कृषी उत्पन्न बाजार समित्यांचा (एपीएमसी) पहिल्या टप्प्यात राष्ट्रीय बाजार म्हणून समावेश करण्यात आला आहे. याबाबतचे शासन आदेश निघाल्यावर या राष्ट्रीय बाजार समितीची नियमावली तयार केली जाणार आहे. यात मुंबई, पुणे, सोलापूर, नागपूर, लातूर, सांगली, छत्रपती संभाजीनगर आणि कोल्हापूरचा समावेश आहे.
नवीन राष्ट्रीय नियमावली लागू झाल्यावर सहकार क्षेत्राचा प्रभाव कमी होणार आहे. बाजार समित्यांचा कारभार राष्ट्रीय दर्जाचा होणार असून, त्यांची सूत्रे केंद्र सरकारकडे जातील. नवीन कायद्यामुळे बाजार समित्यांची सध्याची संचालक मंडळे बरखास्त होतील. कारभार पाहण्यासाठी शासन नियुक्त समिती नेमली जाईल. यामुळे प्रशासकीय स्तरावर कामात संचालकांचा हस्तक्षेप राहणार नाही. त्यामुळे बाजार समिती प्रशासनामध्ये आनंदाचे वातावरण आहे. त्यामुळे या राष्ट्रीय दर्जाचा बाजार घटकांना कोणताही थेट फायदा होणार नाही, असा दावा माजी संचालक संजय पानसरे यांनी केला आहे.

न्यायालयीन आदेशामुळे संभ्रम
मुंबई बाजार समितीच्या संचालक मंडळाची मुदत संपली असून, न्यायालयाने लवकर निवडणुका घेण्याचे आदेश दिले आहेत. आता राष्ट्रीय दर्जा मिळाल्याने संचालक मंडळ बरखास्त होणार असल्याने बाजार घटकांमध्ये संभ्रमाचे वातावरण आहे.